Zum sibenten daz wir hinfüro vns ain herrschafft nit weyter wölle lassen beschweren / sond wieß ain herschafft zymlicher weiß aim verleyht also sol erß besitzen laut der verainigung des herren vnn bauren / Der her soll jn nit weiter zwyngen noch dryngen mer dy enst noch anders von jm vmn sunst begeren / Darmit der Baur solych gütt on beschwert also rüeblich brauchen vnd niessen müg / ob aber des herren dienst von nötten weren / sol jm der baur willig vnn gehorsam für ander sein / doch zu stund vnd zeyt / das dem bauren nit zu nachtail dyen / vnnd jme vmb aynen zymlichen pfenning denn thün.
Zum achten sey wir beschwert / vnn der vil so güter jnnen haben / daß die selbigen güter die gült nit ertragen kinden vnd die Bauren das jr darauf einbiessen vnn verderben. das die herrschafft die selbigen güter / Erberleue besichtigen lassen / vnn nach der billigkayt ain gylt erschöpff / da mit der baur sein arbait nit vmb sunst thye / dann ain yetlicher tagwercker ist seyns lons wirdig.
Zum neunten seyen wyr beschwert der grossen frefel / so man stetz new satzung macht / nit dz man vnß strafft nach gestalt der sach / sunder zu zeyten auß grossem neyd / vnd zu zeyten auß grossem gunst / Ist vnser maynung / vns bey alter geschribner straff straffen / darnach die sach gehandelt ist / vnd nit nach gunst.
: Dye Grundtlichen Vnd rechten haupt Artickel aller Baurschafft. Melchior Ramminger, Augsburg 1525, Seite 9. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Dye_Grundtlichen_Vnd_rechten_haupt_Artickel_aller_Baurschafft.pdf/9&oldid=- (Version vom 3.3.2025)
