Zum zehenden sei wir beschwert / daß etlich haben jnen zugeaignet / wisen der gleichen ecker / die dann ainer gemain zu geherent / Die selbigen werden wir wider zu vnsern gemainen handen nemen / Es sey dann sach das mans redlich erkaufft hab / wann mans aber vnbillycher weyß erkaufft het / Sol man sich gütlich vnnd briederlich mit ainander vergleychen nach gestalt der sach.
Zum ailften wellen wir den brauch genant den todt fall ganz vnn gar abthun habnn / Den nimmer leiden noch gestatten / das man witwen waisen das jr wider Got vnn eeren / also schendlich nemen berauben sol / wie es an vil ortten (mennigerley gestalt) geschehen ist / vnn von den / so sy besitzen vnd beschirmen solten / hand sy vns geschunden vnnd geschaben / vnd wann sy wenig füg hettendt gehabt / hettendt diß gar genomen / dz Got nit mehr leiden wyl / sunder sol gantz absein / kain mensch nichts hinfiro schuldig sein zu geben / weder wenig noch vyl.
Zum zwelften ist unser beschluß vnn endtlyche maynung / wann ainer oder mer Artickel allhie gestelt (So dem wort Gotes nit gemeß) weren / als wir dann nit vermainen die selbigen artickel / wo man vns mit dem wort Gots für vnzimlich anzaigen / wolt wyr darvon abston / wann mans vns mit grnnt der schrifft erklert. Ob man vns schon etlich artickel yez zu lyeß / vnn hernach sich befendt das vnrecht weren / sollen sy von stundan todt vnn absein
: Dye Grundtlichen Vnd rechten haupt Artickel aller Baurschafft. Melchior Ramminger, Augsburg 1525, Seite 10. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Dye_Grundtlichen_Vnd_rechten_haupt_Artickel_aller_Baurschafft.pdf/10&oldid=- (Version vom 3.3.2025)
