Sollen einsemmlen vnd eynnehmen / darvon ainem Pfarrer / so von ainer ganzen gemain erwölt wirt / seyn zymlich gnugsam auffenthalt geben / jm vnd den seynen / nach erkantnus ainer gantzen gmain / vnnd was über bleybt sol man (armen dürfftigen / so im selben dorff verhandnn seind) mittailen / nach gestalt der Sach vnn erkantnus ainer gemain / was über bleybt soll man behalten / ob man Raysen müßt von lands not wegen / Darmit man kain lands steuer dürff auff den armen anlegen / Sol manß von disem überschuß außrichten / Auch ob sach were daß ains oder mehr dörffer weren / die den zehenden selbs verkauft hettent aus etlicher not halben / dieselbigen so darumb zu zaigen / in der gestalt haben von aynem gantzen dorff der sol es nit entgeltenn / Sonder wir wellen vns zymlicher weyß nach gestalt vnnr sach mit im vergleychen / jm sollichs wider mit zymlicher zyl und zeyt ablassen. Aber wer von kainem dorff solichs Erkaufft hat vnn jre forfaren jnen selbs solchs zugeaygent haben / wöllen vnd solen und seynd jnen nichts weyters schuldig zugeben / allain wie obstat vnsern Erwöhlten Pfarrer darmit zu underhalten / Nach malen ablesen / oder den dürfftigen mittailen / wie die hailig geschryfft innhölt / Sy seyen gaistlich / oder welttlich den klaynen zehat wöllen wir gar nit geben / Dann Got der her dz vich frey dem menschen beschaffen / das wir für ein vnzymlichnn zehat scherzen / den die menschen erdicht haben / Darumb wöllen wir jn nit weytter geben.
Zum dritten / Ist der brauch bysher gewesen / daß man vns für jr aigen leüt gehalten haben / wölchs zu erbarmen ist / angesehen das vns Christus all mit seynem kostparlichen plut vergüssen / erlößt und erkaufft hat / Den
: Dye Grundtlichen Vnd rechten haupt Artickel aller Baurschafft. Melchior Ramminger, Augsburg 1525, Seite 6. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Dye_Grundtlichen_Vnd_rechten_haupt_Artickel_aller_Baurschafft.pdf/6&oldid=- (Version vom 26.2.2025)
