Die Schedelsche Weltchronik (deutsch):144

143 <<<Vorheriges Blatt	Die Schedelsche Weltchronik    Blatt CXLIIII	Nächstes Blatt>>> 145
unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

 

verso:

Das sechst alter

Das drit aurelianisch concili wardt diser zeit ausz gescheft des konigs clodovei fu^ergenomen. Das soll sanctus mellanius gesamelt haben. So sollen auch in derselben stat vier andere concili versamelt gewesen seyen nach anzaigen des gastlichen rechtens den gelerten wiszende. Arturus der brittannischer konig hat diser zeit (als man sagt) das konigreich empfangen. Diser wz ein weitberu^embt streithaftig und fast starcker man. der het das allerscho^enst pantzer als eim solchen konig wol gezimet. unnd auff seinem hawbt einen guldein helm darinn ein dragk gegraben was. Er hiesze ime einen guldein schilt vorfu^eren darinn was das pild der gepererin gottes gemalet. das er sie alweg als ein fu^ersprecherin zu allen sachen in gedechtnus haben mo^echt. Auch ein lange und prayte lantzen die mu^ost man wo er gieng mit ime tragen. Er soll auch ein schwert gehabt und gefu^eert haben mit dem er vierhundert und sechtzig man hab erschlagen in eim streit. Sie sagen diser sey gar ein gu^et cristenlich man und ein merer cristenlichs glawbens gewesen und habvil konigreich erkriegt unnd erobert. Zuletst als er in eim streyt vil feind ernidergelegt het do wardt auch er verwundet und in ein innsel gefu^eert unnd daselbst verzuckt das er nindert erschine. unnd man sagt von den brittanniern das sie desselben irs konigs widerkunft nochmaln bis auff dise zeit warten.

Aussiodorus von ravenna ein hohgelert man ist diser zeit von seiner beru^embten lere wegen in groszer achtung gewest. Er was erstlich ein ro^emischer rattherr. darnach ausz beru^erung des heiligen gaists verliesz er die werlt und ergabe sich in ein closterlich leben. Aber dauor was er theodrici des konigs welscherland cantzler und schribe in desselben konigs namen vil sandbrieff an mancherlay person von wertlichen gescheften und hendeln. Er hat auch zu ubung der verstentnns den psalter vernemlich auszgelegt. und darnach von bebsten und kaisern und sunderlich vil von den konig theodato seinem zeitgeferten in einer cronica geschriben und sunst auch ein buch gemacht von der vernunft der sele und anders.

Pristianus der hohgelert man unn philozophus von cesaria in kriechischer und lateinischer zungen hoher farnn hat zu diser zeit zu constantinopel gereichsznet. unnd als er ein fu^erst allergelerter in der ersten freyen kunst grammatica genant gehalten wardt. Also hat er in derselben kunst vil nutzlicher bu^eechlein zu lere und underweisung der ihenen die das gezu^enh des lateins zebegreiffen begeren und sunst ander treffenlich schrift gemacht

Arator der heilligen ro^emischen kirchen cardinal unn gekro^enter poet ist diser zeit in wundersamem ru^om seiner kunst gewest und hat under andern wercken seiner sinnreichigkeit unnd craft die geschihten der appostell in gepundem getichte. unn anders meer zierlich beschriben. Brandanus der heillig abbt zu hibernia ist diser zeit von sunderer seiner heilligkeit und lere wegen in groszen werde gehalten. und ein vater dreyertawsent clostermann gewest. von dem vil wunderperlichs dings geschriben wirdt.

Sidomus appollinaris wardt ausz eim verweser oder vogt zu eim bischoff. Er was nach wertlicher erberkeit fast edel und in schriftlicher lere ein wolgeu^ebter und erfarner man unnd hat vil schwerer sendbrieff gemacht.

Brigida die heillig iunckfraw in schotten land von cristenlichen unn edeln eltern geporn hat zu der zeit des kaiserthumbs iustini des eltern an heilligkeit und wunderwercken geschinen. dann sie was von kintheit auff zu gu^oten tugentreichen dingen. unn sunderlich zu zu^echtigkeit. geschemigkeit. nu^echterheit und massigkeit gantz gefliszen. Sie wardt eins mals von irer muter auszgesend puttern und ku^eemilch zesameln. das raichet sie den armen. do ir mutter die puttern forderet fiel sie in ir gepete do het sie mer dann die andern ir mitarbeitterin. Als ire eltern sie verheyraten wolten do geloben sie got dem herren ir iunckfrewliche kron. Auff ein zeit der arent oder des schnitts vberschwemmet der regen dz ganzt land. allain in iren schnitt fiel nit ein tropf wassers. Sie hat wasser zu pier. stain zu saltz gemachet. Einen plind gepornen erleu^echtet unn sunst vil ander wunderzaichen gewu^ercket.

recto:

der werlt Blat CXLIIII

Benedictus der abbt ein walch unnd vater aller closterlewt hat zu diser zeit die zerstrewten closterlewt zusamen gesamelt und inen ausz erleu^echtung des heilligen gaists ein ordenlichs leben gesetzt. Diser Benedictus ist geporn ausz edelm geschlecht in dem land der statt nursie. die dann an freyheit vnd zuuoran von disem heilligen Benedicto hohberu^embt vnnd namhaftig ist. daselbst hat er sein leben in gu^otten sitten schickende sein gemu^eet zu keiner wollustperkeit gegeben. Darnach ward er gein rom zu der lernung freyer kunst vnd schrift gesendet. Als er aber mercket dz vil menschen in denselben ko^ensten zu^o verlaytung vnd irrthumb wanderten. do zohe er den fu^oesz den er schier in die werlt gesetzt het pald herwider. also nach verachter lernung der schrift vnd nach verlassung vaterlichs hawsz. habe und gu^otter in begirde allain gott zegefallen wonet er ettliche zeit vnbekanter an wu^eesten ayno^eden o^ertern. DIser Benedictus ein man gottes kom an ein ende.xlm.schrit von rom gelegen vnd enthielt sich in einer engen ho^eln drey iar das weszt kein mensch dann allain ein mu^ench genant romanus. daselbst fu^eeret er ein fast gestrengs vnd harts leben in mancherlay anfechtung. das alles blib von ime vnuerschwigen. Diser alallerheilligst man was vnder andern gaben seiner tugent mit eim weissagenden gaist erleu^echtet ausz dem er vil kunftiger vnd verborgner ding offenbaret. Do totila der ko^enig ostrogothorum von diss mans tugent vnd craft ho^eret sagen do wolt er sein heilligkeit erfarnn vnd tet knechtszklaider an vnd klaidet seinen knecht mit konigclichem klaid. Aber Benedictus erkennet ausz seiner weiszheit den konig in knechts klaydern vnd forderet denselben konig zu ime in das closter vnd verkundet ime wz ime kunftig was. vnd sprach du wirdst newn iar regiren vnd in dem zeheden sterben. darumb het ine der ko^enig in hoher erewirdigkeit. Benedictus hat auch sunst viel andere zaichen der heiligkeit bewisen. sunderlich mit eim glasz darein ime die bru^eder gift gemischt hetten. daru^eber machet er das zaichen des creu^etzs vnd das glas zerbrach. Zu letst starb er seligclich im iar des hayls.vc.xxxvi.

Der orden sant Benedictem bru^eeder hat seinen ursprung gehabt nit verr von aquino abrucij der state auff dem berg cassino da ettwen die statt cassina gewesen was. vnnd darnach in der gantzen werlt das beru^embtst closter cassinuz gepawt worden ist. Der heillig benedictus hat nach auffrichtung diss closters den closterlewten erster ein regel grund form vnd weisze zeleben gegeben. wiewol vil abgeschaidner lewt vor ime gewesen sind. Dann als diser heillig man lanzeit in der anyo^ede an tugenten vnd zaichen leu^echtet do versamelten sich vil lewt von go^etlichs diensts wegen zu ime. also das er fu^eran.xij closter pawet vnd mit clo^esterlewten besetzet. Darnach samelet er vil iunger. mit deselben hillf erobret er schier die ganzten werlt. Ausz diss heilligen mans hohscheyn perm orden sind vil heilliger vnd hohgelerter mann entstanden. vnd wievol er dise regel erstlich den schwartzen closter lewten gegeben hat. so haben doch darnach ettlich ander die selben regel auch angenomen. Ausz diss allerhailigsten mans orden sollen hergefloszen sein.xxiiij.bebst.c.lxxxiij.cardinals.tawsent.iiijc.lxiiij.ertzbischoff vnd bischoff.xvm.vnn.lxx.treffenlich abbt.vnd (als babst iohannes der.xxij.schreibt)vm.vc.lv.canonisirter unn erhebter mu^ench. Scholastica sannt Benedicten schwester was von kintheit auff got ergeben. Ir bruder besuchet sie bede eins tags in gotes lob unn heilligem geko^ese die zeit bis an die nacht verzogen hetten vnn er nach empfangner speisz wider zum closter wolte do bate ine sein schwester die heillig closterfraw lenger bey ir zebleiben vnd von frewden des himlischen lebens mit ir zereden. vnd do er sprach das er ausz der zell nit blieben wolt. do kom ausz erwerbung scolastice ein solcher regen vnn vngewitter das er mit seinen bru^edern die fu^eesz ausz der lettigen erden nit ziehen mocht. Also rezereten sie die gantzen nacht vngeschlaffen mit heilligem geko^esze von geistlichem leben. An dem nachfolgenden tag zohe er heim in sein closter. Also nach dreyen tagen als er in seiner seine awgen aufhu^ob do sahe er seiner schwester sele vomm leib in gestalt einer tawben auff in die himel farnn.