Die Schedelsche Weltchronik (deutsch):145

144 <<<Vorheriges Blatt	Die Schedelsche Weltchronik Blatt CXLV	Nächstes Blatt>>> 146

unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

CXLIIII verso:

Das sechst alter

BOnifacius der ander ein ro^emer ist nach felix dieweil dre kaiser iustinianus regiret babst gewesen. unn (als etlich sagen) nit on gezengk vnn zwaynng erkorn worden dann dioscordus wardt an babsts felix stat erwelt. Aber die pfafheit in diser aufru^or xxviij.tag beku^emmert wardt zu letst durch absterben dioscon dauon wider erledigt Diser bonifacius ordnet das nymant imeselbs einichen nachkomen in bischoflicher wirdigkeit erwelen solt. das dann darnach vil bebst bestettigt haben. Item er setzet das nach abgang eins babsts amm dritten tag wo es geschehen mo^echt ein ander gesetzt solt werden. Item er sunderet das volck von der pfafheit. so die go^etlichen ambt gehandelt wurden. Er verpote auch das ein bischof weder in burgerlichen noch peynlichen sachen fu^er einen werltlichen richter gefordert werden mo^e. Er starb als er zway iar zwen tag geseszen wz vnd der stu^ool ru^oet deszmals zwen monat. Jar der werlt.v^m. vij^c. xxiij. Jar christi. v^c. xxiiij

IOhannes der ander ein ro^emer was ein babst bey kaiser iustiniani zeiten. der hat in anfang seins babstthumbs den bischof anthimuz vin abfals wegen in die arrianischen ketzerey verdambt. Der kaiser iustinianus in willen den ro^emischen stu^ol zeeren hat deszmals zwen bischof mit gaben gein rom gesendet son seinen wegen den ro^emischen babst damit zegru^eszen. vnd dieselben gabe sant peters tempel zeopffern. Nemelich einen gildein kopf mit edelm gestain von sechs pfunden. Diser Iohannes (von dem die geschichtbeschreyber wenig setzen)starb als er.ij.iar. vnd.iiij.monat geseszen was vnd der stu^ol feyret sechs tag.

AGapitus ein ro^emer wardt zu babst gemacht vnd von stundan von dem konig theodato zu dem kaiser iustiniano gesendet zestillen seinen zorn den er vber theodatum het darumb das er amalsiuntham des konigs athalarici muter zeverschiken vnnd zeerto^edten het verfu^eget. Als aber agapitus vomm kaiser erlich empfangen wardt vnd fride erworben het do wardt er vomm kaiser angesunnen die euticianischen wone vnd maynung zebestettigen. do aber der heillig man sich des widersetzet do field der kaiser gein ime in bedroung. Do sprach agapitus ich hab mir gewu^enscht zu dem allercristenlichsten kaiser iustiniano zekomen so hab ich dioclecianum gefunden der ein wissentlicher feint der cristen gewest ist. Ausz solcher freyer rede vnd go^etlichem geschicke wardt iustininianus bewegt dz er den recht cristenlichen glawben anname vnd anthimum den constantinopolitanischen bischoff vnnd beschu^etzer der euticianischen ketzerey auszgetribe vnnd einen andern recht cristenlichen man an sein stat setzet. den diser Agapitus weyhet. vnnd vnlanng darnach zu Constantinopel starb als er xi. monat.xix.tag geseszen was.

Jar der werlt. v^m. vij^c. xxxiiij. Jar christi. v^c. xxxiiij.

SJlucrius ausz campania wardt ausz gehaisze oder gepote des konigs theodati zu babst gescho^epft. wiewol solchs dauor nit ausz koniglichem sunder kaiserlichem gewalt beschahe. aber die bedroung des konigs fu^ertraffe die vernunft vnnd redlichen vrsach des gesetzs. dann er droet der pfafheit den tod ausz anwegung Vigilij des ro^emischen diacons vnd schatzmaisters gepote. Theodora die kaiserin siluerio den babst bey bedroung mennam den constantinopolitanischen bischoff zeuertreiben vnd anthimuz herwider zeberu^offen. des widersetzet er sich. do schub die kaiserin den herfu^erer belizario den siluerium auszzestoszen vnd vigilium an sein stat zesetzen belizarius mit kriegs hendeln beku^emmert befalhe die sach anthomme seim weib. do bestellet vigilius ettlich zeu^egen die beschuldigten siluerium das er die statt rom het wo^ellen verraten. demnach wardt siluerius gezwungen sich des babstthumbs zeuerzeihen vnd ein closterlich leben anzenemen. Der wardt in ellend verschickt vnd starb nit on wone der heiligkeit als er ein iar.v.monat.xij.tag geseszen was. Vigilius der ro^emer wardt zu der zeit iustiniani zu babst erwelt.an den begeret die kaiserin theodora gein constantinopel zeziehen vnd anthemiuz wider einzesetzen. do er sich des wideret wardt er gein constantinopel gefu^ert vnd darumb also hart geschlagen das er schier gestorben wer vnd an eim strick durch die gantzen stat bis zu vesperzeit vmbegezogen. darnach in einen kercker gelegt vnnd ettwielang mit prot vnd wasser gehelligt. also gedultigclich das er alweg sprach sich noch ergers verschuldet haben wo er mit gepurlicher straff gepeinigt werden solt. Nachfolgend wardt er herwider beru^eft vnd starbt als er.xvij.iar.vi.monat.xxvi.tag geseszen wz

CXLV recto:

Blat CXLV

der werlt

IVstinianus der schwester iustini sun. der ro^emischen kaiser der gro^eßist hat das kaiserlich fu^erstenthumb erlangt. vnn alszpald nach empfahung kaiserlicher oberkeit sein gemu^eet zu widerbringung des stands gemayns nutzs gekert. vnnd das Ro^emisch kaiserthumb in glu^ocklicher zufelligkeit geregiret. vnnd nit allain kriegszhenndel glu^ecklich gefu^eert. sunder ist auch in sittlichen burgerlichen sachen vn gescheften wundertatig gewest. dann er hat durch belizarium den groszen man die persier kreftigclich ernidergelegt. Das volck wandalorum mit irem Konig Golifinero abgetilgt. vnn gantz affricam (die.xcvi.iar vomm ro^emischen reich entwenndt gewesen was) wider an das reich gebracht. vnd widerumb mit kreften des vorgenanten belizarij der gothier volck in welschem land vberwunden. vnd vitigem iren ku^enig gefangen. vnnd das volck maurorum vnd iren konig attilaz mit wunderperlicher kreft vnd sterck niderworffen. vnd gleicherweisz auch andere vo^elcker mit krieg bewzungen. Diser kaiser hat auch in der stat constantinopel den herrn. der do ist die weiszheyt gotes des vater einen tempel gepawt vnnd den nach kriechischer sprach Agiam sophiam. das ist die heilligen weiszheit genennt. Dess gepew alle andre also vbertrift das an allen o^ertternn des ertreichs seins gleichen nit gefunden werden mo^echt. Diser kaiser was ein rechtglawbig man. in wercken rechtfertig. in gerichten vnn vrteiln auffrichtig darumb bekomen im alle sein ding zu gu^oten. Er hat als ein synnreich man mit rat vnn fleisz ettlicher treffenlicher hohgelerter mann dz grosz vnermessen meer der rechtbu^echer. der vber.qm in zerru^edter vndordnung zerstrewet warnn in ein klaine anzal bu^echer gebracht. vnnd vil miszhelliger gesetze in gleich lawt gezogen. Als er. xxxviij.iar geregirt het starb er zu constantinopel ein man groszer vnd go^etlicher sinnreichigkeit.

DAs funft concili zu Constantinopel gehalten ausz gescheft des babsts agapiti vnd des kaisers iustiniani vorlangst angefangen. hat sich zu der zeit vigilij des babsts. imm iar des hails. vc.xxxviij. geendet. wider theodorum. vnd alle ketzer. die do hielten das die allerseligst iunckfraw maria allain menschen vnnd nicht got vnn menschen geporn het. In demselben concili wardt gesetzt das die selig iunckfraw Maria ein muter gottes solt genant werden. das sie vnns mit irer geperung got geporn het. Alda warden.xiiij. capittel der verfluchung wider die lesterung theori vnd seiner gesellen beschriben.

BElizarius ein man ratherlicher erberkeit. gestreng in waffen. ein fu^erer des kriegs von dem kayser iustiniano mit groszer menig geordnet hat erstlich die persier die die ro^emischen gegent schwerlich beschedigten angegriffen vnd mit groszen streitten ernidergelegt. vnd ist mit willen des kaisers zu constantinopel triumphirende eingezogen. Diser Belizarius wardt von iustiniano dem kasier gein affricaz. die das volck wandalorum vil iar beseszen hetten mit eim heer geschickt. Der hat eylends mit den wandalischen einen streyt getan inen vil volcks nidergeworffen. iren konig Gelisinerum gefangen vnnd gein constantinopel gesendt. vnnd die statt carthago wider an das reich gebracht. Darnach wardt diser von vil streyten hohberu^embt Belizarius von iustiniano wider den konig theodatum geschickt welsche land van der dienstperkeit der gothier zeerledigen. Dieweil nw Belizarius ettliche zeit in sicilia verzohe do starb der gothier konig theodatus. an desselben stat kome einer genant vitigis. wider denselben verfu^eeret belizarius den angefengten krieg. ausz sicilia in campaniam ziehende gein neapolis. die eroberet er mit gewalt. erto^edtet vil lewt keins alters. noch iugent noch weiplicher person verschonende. von dannen eylet er gein Rom da fluhen die Gothier die daselbst warnn bey nacht herausz vnnd lieszen die thor offen vnnd zohen eylent in die statt rauenna. Als aber belizarius maynet das der konig vitigis mit groszer heers craft fu^er rom ziehen wurd do bewaret er alleweil die statt mit mawr schu^ettwer vnd graben in groszer eyle. Nw kom der konig vitigis wol mit hundert tausent menschen. Als aber belizarius die statt lenger dann iar vnd tag beschu^etzt het do entschloss er sich mit vitige vnd seinem heer zeschlahen Aber vitigis wolt sein nit erharren sunder fluhe gein rauenna. dem eylet belizarius nach vnd fienge ine in der statt vnnd fu^eeret ine gein constantinopel im funften iar seiner zukunft in welsche lannd