Was darvmbe vn̄ iſt v̾ſwūden

Was darvmbe vn̄ iſt v̾ſwūden·
vns d̾ ſvmer des mac w̾den rat·
ſin zit wirt wol wider fundē·
ich klage dc dv́ w̾lt ſo úbel ſtat·
dc nv truret maniges lip·
der fro ſolde ſin dur guͤtiu^{[WS 1]} wip·

Froͤide vn̄ zuht hat vil nach ende·
ivnge vn̄ alte ſint niht wol gemv̊t·
got dē grôſſen kvmber wende·
ſo dc noch die richen w̾den gůt·
die ſiht man vngvͤtlich leben·
trurē hat in gros úbel geben·

Mich nimt wūder dc die ivngē·
vn̄ die richē trurent bi ir zit·
wc hat ſi dar zv̊ betwūgen·
dc in wib noch ivgēt froͤide git·
nv ſin trurig vn̄ vnfro·
mir ſtat dvr ein wip min mv̊t ho·

Dú hat ſich vil wol behuͤtet·
vn bewart voꝛ aller miſſetat·
ir lip mir ſo gvͤtlich guͤtet·
dc min mv̊t vō ſchuldē hohe ſtat·
ſi iſt ſo reht gvͤtlichē gůt·
dc ir gvͤte mir git hohē mv̊t·

Dur die reinē ſvͤſſen gv̊tē·
h̾zeliebē w̾den frowē min·
wil ich mit dien wolgemv̊tē·
iemer gerne hohes mv̊teſ ſin·
mir iſt liep dc ich bin fro·
da vō ſtat mir min gemvͤte ho·

Anmerkungen (Wikisource)

1. Vorlage: guͤte.