Svmer gegen diner zit

Svmer gegen diner zit·
singe ich minen sang·
mit dien vogellin·
schowent wie dú heide lit·
die der winter twank·
si hat liehten schin·
mit den blv̊men dvr dc gras in ir varwe gesvndert·
hvndert·
ist ir niht me·
gruͤnen kle·
sach ich vf der heide da was ich ê·

Wan dc ich wol halber tobe·
ich geswige ir gar·
ie der frowen min·
die ich vor in allen lobe·
wie nimt si des war·
ich mv̊s trurig sin·
swa sich froͤit ein selig man· der mit liebe kan slafen·
wafen· ist minne dc·
sprechent was·
dc ich minne die dú mir ist gehas·

Swer nv siner frowen treit·
holdes herze den·
wil ich leren dc·
er si fro dar zv̊ gemeit·
sich niht sere sen·
vf der valschen has·
swer dien frowen gerne tůt· gv̊t vnd ere mit grůsse·
sv̊ze· der wirt gewert·
swes er gert·
frowen die sint gv̊t húre alsam vert·

Sit dc frowen gvͤte kan·
herze machen vro·
so sin wir gemeit·
dien sol man sin vndertan·
si vertribent so·
swere herzeleit·
si sint die man eren sol· zallen froͤiden· mit trúwen rúwen·
rúwen·
sol niemer man·
swer es kan·
dc er si wol ere vnd in gv̊tes gan·

Wan sol reinen vrowen iehen·
dc si sin gefuͤge·
vnd ǒch tvgenden vol·
swem si wol von in geschehen·
der lâsse ins genvͤgen·
vnd spreche in wol·
wan si sint der werlde spil· vnd ir wunne mit steten·
heten die manne niht·
ir angesiht·
so were in der werlde dú froͤide ein wiht·