Stammbuch berümpter Fürsten, Graffen vnnd Herren Geschlechter:Seite 106

<<<Vorherige Seite	Stammbuch Oder Erzölung aller namhaffter vnd inn Teütschen Historien berümpter Fürsten, Graffen, vnnd Herren Geschlechter	Nächste Seite>>>
fertig	Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.

 

vnd der Landtgraff zu^o Hessen eingenommen / derhalben / dz für Hertzog Heinrichen die Protestierende stende / keinen fride noch rhu^o haben kunden. Ist aber hernach / als der Churfürst gefangen / jme wider nach seiner erledigung zu^ogestelt worden Anno 1547.

Wunstorff / Eine Graffschafft im Hertzogthumb Braunschweig gelegen.

Anno 937 ist Friderich Graff zu^o Wunstorff auff dem Thurnier zu^o Magdeburg gehalten / mit gewesen.

Anno 1114 haben die Graffen gestifftet das Augustiner Closter zu^o Verden. Metrop. lib. 6. cap. 33.

Anno 1260 ist Graff Widekind Bischoff zu^o Minden auff die Hertzoge zu^o Lüneburg vnd den Graffen von Wunstorff gezogen / mit hülff der stat Minden / vnd gegen sie dz feld behalten. lib. 8. cap. 16.

Es sol auch Hildebrandus Bischoff zu^o Bremen ein Graff von Wunstorff gewesen sein / schreibt Crantz in Metrop. lib. 8. cap. 20.

Anno 1461 haben gelebt Julius Heinrich vnd Ludolph Graffen zu^o Wunstorff / werden in einem briefe von dem Graffen zu^o Manßfeld vnnd herrn zu^o Querfurt liebe schweger / Ohmen vnd G. H. genennet.

Anno 1481 hat Graff Ernst zu^o Hohnstein eine tochter einem Graffen zu^o Wunstorff ehelichen versprochen.

Hertzog Wilhelm zu^o Braunschweig hat dise Graffschafft erkaufft vnnd vnder das hertzogthumb Braunschweig bracht. Saxo. lib. 12. cap. 31.

Zorbick / Eine Graffschafft ligt zwischen der Salen vnnd Elbe / man sagt / dz vor zeiten die Sorabj da sollen gewohnet haben / vnd die Burg gebawet. Darnach haben die einbekommen Widekindj nachkommen / die Marggraffen zu^o Meissen / Landgraffen inn Thu^eringen vnd Hertzogen zu^o Sachsen worden seind.

Anno 1260 bracht Rupertus ein Graff zu^o Manßfeld vnd Ertzbischoff zu^o Magdeburg dise herrschafft zu^om Stifft. Metrop. lib. 8. cap. 23.