So we dir welt so we im der dir volgen mv̊s
[346r]
So we dir welt so we im der dir volgen mv̊s·
din lon ist krank dv gist den angel iemer nach der svͤsse
dv[WS 1] treist vntrúwe vnd allen valsch vf dinem rugge enbor·
ich han in dinen weg gesetzet minen fůs·
es wende got von himle so wene ich dir volgen mvͤsse·
dv zv́hest mir den haln als ein ivngen katzen vor·
din lon ist als ein richer trǒn·
der nach dem slafe swindet·
dv hast in minnen mvnt gestriket dinen zǒn·
da von min lip in diner lere erblindet·
ze dir ich nakent [346v] wart geborn· vnd scheide ǒch blos von dir·
ein linin tv̊ch fúr mine schame vnd anders niht gist dv zelone mir·
Als ieman kvmt der von der stir marke vert·
ob er den tvgentrichen von orte sehe[WS 2]
vnd ob er si gesvnt vnd ǒch mit froͤiden lebe·
si sprechent alle er si der schanden gar verhert·
vnd dc nv lúzel ieman lebt der sich im des genehe·
dc er so willekliche als er nah hohen eren strebe·
ald ǒch gesvnt mit froͤiden si·
so wirde ich vro der mere·
dar nah zehant so wont mir sa ein truren bi·
des ich vil lihte vnd ǒch vil sanfte enbere·
vnd dc nu lúzel ieman lebt die vri als er von schanden sin·
der vinde ich leider fv́nfe niht von vngerlant zeberge vnz an den rin·
Ich bin des edeln werden kúniges milte fro·
dar inne er lebt vnd da bi pfligt so tvgentlicher gvͤte·
da von sin lob von schulden stiget vnd hohe stat
des edeln keisers kint· die sol man prisen so·
vnd stvͤnde ein gantzer walt von tvgenden vnd in milter blvͤte·
der konde niemer volle tragen die tugende die er begat·
er ist als ein rein bernde bǒn·
der obs mit willen reret·
ir aller milte ist gegen der sinen gar ein trǒn·
sîn hant vil manigem sin gúlte meret·
des iamert mich wan ich der eine nie gegen im genôs·
es irret ǒch sin milte niht wan min vnselde dú ist alzegros·
So we dir werlt din werdekeit·
dú nimt an mangen tvgenden abe·
wan siht ir truren vil die wol zefroͤiden sint gestalt·
an libe vnd ǒch an richer habe·
mit willen svnder herzeleit·
die selben hat betwungen des dú schande vnd ir gewalt·
dc si des rehten hant verpflegen·
dc man da heisset werdú fůre· trúwe zuht vnd ere·
der besten froͤide ist leider nv vil nah gelegen·
swa dc beschiht dc mvͤt mich an die richen edeln sere·
wc sol ein truren dc man niht vúr sv́nde vnd ǒch vmb ere pfliget·
wc sol ein gv̊t dc weder lib noh sele froͤit noch schanden an gesiget·
Mir tůt vil manger als ein wib·
dú has ir werden minne treit·
vil dike vmbe anders niht wan vmb ir selben missetat·
vnd ist ǒch nieman alse leit·
als im ob ir vil valscher lib·
der dinge iht tůt dc im ald ir an eren missestat·
got weis vil wol als ist ǒch mir·
swa richer herre an tvgenden vnde an werdekeit verdirbet·
wc richet er ob ich mit schelten in verbir·
vnd er mit nide vnd ǒch mit hasse in schanden vf mich wirbet·
nv rich vns beiden got dú leit· dú war ane alle schulde tragen·
den biderben man von boͤsen wibe· vnd mir von tvgendelosen argen zagen·
Wie swert man nv der herren rat·
ich weis wol wie man wilent swůr·
wan riet in trúwe vnd ere· vnd allen werdeklichen mv̊t·
si rieten dc man schone fůr·
ân erge svnder missetat·
si rieten dc fúr fluͤche vnd ǒch vúr schelten were gv̊t·
do mvͤsten ovch die herren swern·
dc si den ganzen reten bi· mit rehter volge weren·
hie mite wellent si sich valscher fůre weren·
der herren vil verdirbet von den trugelosen meren·
ich weis dem herren ist sin rat vnd ǒch sin volge als e gesworn·
dc eteswa der eide vil verschroten wirt die weren bc verborn·
Ich han der swabe werdekeit· in froͤmden landen vil gesehen·
da wurben si nach prise also das man in wirde mv̊ste iehen·
nv wil ich in ir lande ervarn wie sie da sin gemv̊t·
swer mir da heime vnd anderswa von schulden mv̊s gevallen wol·
der si gewis dc ich im tůn mit sange als ich zerehte sol·
ist dc ich in vinde also dc er vor schanden ist behv̊t·
ein lob dc vs der kv́nde vert
dc hat der wisen volge in allen landen·
vil maniger vnderwilent gv̊t· dvr gúde bi den froͤmden zert·
den man da heime siht in grôssen schanden·
swer beide lob behalden wil der ere sin hvs dc ist min rat·
dc wassˢ niender ist so gůt so da es von sprvnge vf gat·
Swer sine rúwe an dc ende lat·
der tv̊t als ein vnwiser man der gebuwen hat·
ein hvs mit schonem holze gůt·
do kom ein zv́rnig fúr dar an·
do stv̊nt sîn sin sin wort sin rat·
vf anders niht wan loͤscha herre als noh vil maniger tůt·
do im vergie das fúr die túr·
do mv̊st er seibe vnd dvch sin gv̊t· in sinem hvse verbrinnen·
dis bispel kv́nde ich mir vnd tvmben lúten fúr·
dc wir den sv́nden vor dem tode enpfliehen vnd entrinnen·
het ǒch der selbe vnwise man gewunnen e den selben mv̊t·
so het er vor des fúres kraft [347r] sich selben vs getragen vnd ǒch sin gv̊t·
Ein lǒb ist manigen lúten bi dc niht an eren frumt·
vnd ǒch zekrank wirde dort an selekeite kvmt·
da niht belibet vnderwegen· swas an vns allen wirret·
wan seit von eime er si getrúwe· vnd anderre vůge niht·
der ander hat mit kv́ndekeit gegen valscher fůge pfliht·
der drite ein wening wol gezogen· die sint da mit verirret·
wan seite der vierde si ein degen
des libes vnd ein arger zage des gůtes·
wan seit der fúnfte kvnne wol sin selbes schone pflegen·
vnd si da bi vil gar verschamtes mv̊tes·
wan seit der der sehste minne got dv́ wile ist ǒch verlorn·
get es von herzen niht vnd ander tvgende hat verkorn·
Swenne ich von akers kvm gewant·
her in der tútschen habe·
min kvnft erschillet in dv́ lant·
das eteslicher wol da vúr geswuͤre·
der niht vor schanden ist bewart·
so mvͤze ich cristes grabe·
niemer geleisten mine vart·
ob ich die selben niht mit schelten ruͤre·
die wile so gibe ich in allen vride·
dc ich ir laster offenber gesinge·
vnd weis doch wol solt man mich loͤsen von der wide·
dc ich niht mag verlassen ald ich betwinge·
vnd weis[WS 3] doch wol ê ich ein argen zagen getwunge vf milten mv̊t·
dc ich mit riemen liehter twunge einen stein dc man im an der ader liesse blv̊t·
Swes lob also vernagelt wirt dc niht ein meister bvͤssen kan·
dc nimt an dien eren abe dc lihte ein kv́ndig man·
sin hinken an der wirde spúrt dar nach ein struchen schiere·
vnd nach dem struche ein vallen des es lihte niemer sich erholt·
als man die niete nieten sol dc es vnsanfte dolt·
ir ist da her in minen lobe verdorben mir wol viere·
dien starke nagel sint geslagen·
hin dvr die tvgent vnd andertalp verzwiket·
ich kan úch anders niht von in gesagen·
swc man mit argen sprivchen vf si gebiket·
so sint si doch an tvgenden gar erlamt·
tprútsch vnder dandern die sich hant an werdekeit verschamt·
Sv́sa wie wunneklich der vs oͤsterriche vert·
sit er sich dvr des obersten kúniges ere·
libes vnd wibes gv̊tes dar zv̊ der kinde hat bewegen·
dc er da her behalten hat· wie schone er dc nv zert·
mich wundert swenne der kúnig hin gege sahsen keret·
vnd er gegen akers vert· welher da verdienen mvge bc der selden segen·
dc ist ein seliklichú vart
die got mit hvndert tvsent lonen giltet·
swelh man sin gv̊t dar vf erspart·
der dvnket mich ein gǒch swer in darvmbe schiltet·
het ich getrúwet solher dinge an dem von osterlant·
dest war im wer min schelten húte vnd iemer vnbekant·
So sich der lib verwandelt hat vnd so du sele von vns vert·
vnd si niht weis wes si bedarf· we dc der werlde ie wart beschert·
solh angest vnd dú zůuersiht der mensche bedenken sol·
dú werlt in valscher vůre lebt· swer si ze rehte erkennen kan·
wie si nah tode lonet· die dc gv̊t hie wider erbet an·
we dc dv́ sele niht sippe hat· des wirt dú helle vol·
nah dem tode ir nieman pflegen wil·
sú gahen niht wan wie si dc gv̊t geteilen·
si heten wilent do si lebten mage vnd ǒch der frúnde vil·
wa sint si nv die si von sere heilent·
in ist geschehen als vns geschiht· wir sparen vnz vf den lesten tag·
so setzen wir hie dú hohen pfant dú niman dort erloͤsen mag·
Ein wort der keiser otte sprach·
dc ich vnz an min ende wil behalden·
klagte ime ein valscher vngemach·
des trúwe er vsse vnd inne wol erkande·
do sprach er mir ist vmbe dich·
des setze ich mine warheit dir zepfande·
rehte als dir ist vmbe mich·
der stete svln wir gegen ein ander walden·
ein valscher frúnt mit valsche klaget·
swc sinem stetem frúnde leides wirret·
wil er gelǒben swc er saget·
so wirt der stete frúnt an sinen troste gar verirret·
wan seit dc der gelǒbe si gar ane gvͤtú werk ein niht·
als ist mit rede ein frúnt den man niht an der helfe siht·
Swer sich mit froͤmden lúten wil·
verwerren der sol svͤnen mit den kvnden·
wil er der viende machen vil·
dc krenket in ob er tuͤret frúnde veile·
nv seht an dem von osterlant·
wie dem gelungen ist zesînem teile·
dor an den vienden niht erwant·
do solt er an den frúnden sin erwinden·
mit rate den wisen wol behaget·
wan sol zenot die kunden frúnde behalte·
swer viende flúhet frúnde iaget·
[347v] ob dem gelinget wol· dc mv̊s vil gar gelúke walden·
ist dc der frúnt zeviende wirt vnd vnder zv̊ den froͤmden swert·
da wirt ein klemmen dc ir eime vnselde wirt beschert·
Swelh fúrste nach dem keiser gant·
dem gelich als ern mit trúwen meine·
vnd vf in prúuet valschen rat·
der hat sich zim in wolves wis gesellet·
der slichet in dem walde nach
dem man ist dc er struchet ald er vellet·
zehant so wirt dem wolue gach·
dc er vf im gelige der valsche vnreine·
her keiser seht zem vůsse vúr·
ir sult úh hinden wol mit witzen hvͤten·
der úch in wolfes orden spúr·
dc vnder stet enzit· e dc der valsch beginne bruͤten·
von einem halme kumt ein fúr· der niht sin zúnden vnderstat·
da von ein hvs enbrinnet gar vnd an die schúren gat·
Wie wirt der richen argen rat·
si wellent vúr noh hinder sich gedenken
vor gotte ist gros ir missetat·
vnd sint ǒch von der werlte hie beschvlten
si scheident von der werlte blos von gote hin·
so hant si weder hie noch dort vergulten·
wie trúget den sin krank sin·
der sich den tieuel lat also beschrenken·
dc er zesamen hordet gv̊t·
dc vf in wůchert sv́nde vnd da bi schande·
wie we dc andem ende tůt·
swenne ers berinpfen mv̊s vnd er den kvmber gerne wande·
so hat er sich versvmet gar sin spetú rúwe im kleine frvmt·
swenne er in zer helle porte vúr sinen meister kvmt·
Ob ich niht grosser doͤrfer han·
noh vil der grossen stette in witen landen·
so bin ich doch des wol erlan·
dc ich durh vorhte lútzel ieman diene·
were aber ich herre in osterlant·
ê ich verlur die gv̊ten stat zewiene·
ich wolde ê riten vf den sant·
zenv̊renberg da mich die lúte erkanden·
mich dúhte an mezzen niht zevil·
zeriten nach des richen keisers hvlden·
der mir zetrappen stieze ein zil·
dc wolde ich holn ê ich verlúr zwei lant ân mine schulde·
ich wil der witen lande vnd ǒch des grossen geltes gar gedagen·
die edelen dienest man die wolde ich niemer me verklagen·
Merkent welh ein svnder art· der storch erkennet sinú zit·
der wije vnd ǒch dú kleine swal· wa si den kalten winter lit·
der werde mensche erkennet niht· den der in gebildet hat·
al vber dem stein des slangen vart· vnd vf dem mer der schiffe gang·
vnd in den lúften arn flúge· nieman erkennet min gedank·
noch eines ivngen mannes mv̊t der vnder drisseg iaren stât·
der ar der ivnget sich ǒch wol·
dc hoͤren wir von der wisen meister lere·
der slange ivngert sinen balk· dc hoͤren wir singen vnd sagen·
der werde mensche ivngert sich niht mere·
swer vf dú ahtzig iar kvmt· mit valwem hare vnd ane stab·
als es nv in der werlte gat der iehe dc im vro selde gab·