|
Christian I. (Dänemark, Norwegen und Schweden): Item privilegium der lande Sleswigk Holsten unde Stormarenn |
|
|
eyn lenhere der lande Holsten unde Stormeren[1] samptliken edder bezundergen; offte ok nu we sik vorleninge mende to hebbende uppe etlike desser land van macht des keysers edder wor id aff were gestlik edder werlik. Offte redere desser land mid deme drosten unde marschalke to nutticheit der land edder etliken jegen wes boden setteden schickeden edder vrede makeden mid naberen desser land, schoken wy unde willen alle stede unde vast holden wente to unser tokumpst unde sedder uns holden in den saken na rade unser redere darsulvest na gelegenheit der sake. Wy laten ok dat nu to unde vulborden in crafft desses breves, also dat de droste unde marschalk effte unse redere mogen vorvolgen unde rechten de jennen de dar jedgen don. Ok willen wy unde scholen na unseme vormoge schicken, dat men holde in deme hertogdome dat lowbok wor id nicht en is jegen article desses breves. De slote der land schal men holden van den renten unde offt dar redlik broke vallet, de scholen unse vogede winnen na landrechte edder mid vruntschup unde nicht mit wald. Hefft we in den landen Holsten unde Stormeren Hollesch edder ander recht, de dat will affsetten so wy dar to eschet werden, willen wy sulkes affleggen unde gunnen en Holsten recht. Wes eyn inwaner desser land gestlik edder ridderschupp hebben will to siner egene behoff unde nicht to kopenschop, dar dorff he nergen vore tolnen in dessen landen. Unse vogede in dessen landen scholen de slote unde stede holden to unser truwen hand, na unseme affgande to truwer hand unser erben. redere, de se vord scholen holden to truwer hand des, de denne here werd to den landen na vorgeschreven wise. Offt etlik van binnen edder van buten mid wald desse lande vorg. beschedigen wolde edder jegen landrecht dede, .so mogen unse droste marschalk unde redere unse undersaten vorsammelen an unsem affwesende unde keren sodane wald unde arch aff. dar schal eyn islik to helpen. An unseme affwesende mogen unse droste unde marschalk beden wes en dunket nutte sin vor de land wente to unser tokumpst. Alle desse vorg. article sweren wy in den hilgen in guden truwen na unseme besten vormoge stede unde vast to holdende, unde laven vord vor uns unse erven unde nakomelinge alle desse unde werdigen heren prelaten ridderschupp manschupp unde gemenen inwoner des hertogdomes Sleswig unde der lande Holsten unde Stormeren unde to truwer hand den rederen der sulven landen vorben. stede unde vast to holdende unvorbroken sunder arch, unde hebben des unse koninglike secret nedden an dessen bref heten hangen. Unde to merer witlicheid hebben wy Johannes to Aarhusen, Kanutus to Wiborch, Jacobus to
Christian I. (Dänemark, Norwegen und Schweden): Item privilegium der lande Sleswigk Holsten unde Stormarenn. Ripen 1460, Seite 31. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Vertrag_von_Ripen_04.tif&oldid=- (Version vom 12.6.2020)
- ↑ „Nota: contra Cristiernn secundus qui volebat esse dominus feudi et ideo expulsus“.
