|
Christian I. (Dänemark, Norwegen und Schweden): Item privilegium der lande Sleswigk Holsten unde Stormarenn |
|
|
desgelik to hebbende over dat land to Holsten unde Stormeren enen marschalk, de ok sin ambacht do so sik bort. Densulven drosten unde marschalk scholen wy vorsehn, dar se eren staet affholden unde der de se to sik eschen an den rad, na deme wy des mid en overeenkomen. Unse droste unde marschalk scholen ok des jaers vakene dingk holden unde recht an den jegenen des landes dar id mest behoff deit. Ey willen umde scholen ok alle jar sulven eens landrecht holden in islikeme lande, wanner wy sunder hinder sind, unde horen denne alle merklike clage unde de vorscheden na rade unser redere. Unse droste unde marschalk scholen haven alle dingk an deme rechte gode vor ogen hebben unde waren sik soverne se ere eere ruchte unde gud leff hebben, dat se nene gunst edder geve nemen vor recht. Weret dat se des vor wunnen worden, wy wolden dat richten uppe dat hogeste. Darumme scholen alle drosten unde marschalk, dat se en bistendich sin unde helpen ere recht beschermen, wor unde wanner se dat eschende werden. Desse vorben. land laven wy na alle unseme vormoge holden an gudeme vrede, unde dat se bliven ewich tosamende ungedelt[1]. Darumme schal nemand veyden den anderen men eyn islik schal sik nogen laten an recht. Uppe dat sodan vrede destobet holden werde, scholen wy unde willen unse amptmanne alse drosten marschalk schenken kokemester vogede unde dergelik hebben an dessen landen inwanere desser land unde en unse slote borge unde lehne darsulvest don unde anders nemande. Wanner wy willen an desse land tehn, so scholen unse droste marschalk amptmanne unde vogede desser land uns bestellen nogaftige denere de uns annamen unde bi uns bliven dewile wy in densulven landen wesen willen. Willen ok mid velheid volkes gesterie unser unser husfrowen edder unser kindere de land nenerleye wiis beswaren, men scholen alle unse teringe unde stad holden van unsen renten. Den plochman edder husman schal nemand beroven edder berne, all worde sin here geveydet, bi broke des landvredes. Nachdeme de inwoner desser vorg. land uns sodane gunst willen unde vruntschop bewiset hebben, so lave wy en unde eren nakomelingen se alle to holdende schadelos van aller maninge ansprake veyde unde anvechtinge de schen mochten offte etlike sik seden recht to hebbende to dessen vorg. landen samptliken edder besundergen van ansprake wegene unser leven brodere und den heren van Schowenborch, ok offt jemand sik mende to wesende
Christian I. (Dänemark, Norwegen und Schweden): Item privilegium der lande Sleswigk Holsten unde Stormarenn. Ripen 1460, Seite 30. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Vertrag_von_Ripen_03.tif&oldid=- (Version vom 12.6.2020)
- ↑ „si tamen unus princeps est eligendus ut prefertur prohibetur divisio frusta cum duo sind electi videlicet Johannes et Fridericus“.
