Owe dirre not· sprach ein magt der svmer wil zergan

Owe dirre not·
sprach ein magt der svmer wil zergan·
des gewinne ich noch vor leide vil lihte ein grawes har·
ich sach die blůmen rot·
vor dem walde trureklichen stan·
die heten alle liehten schin nv valwent si aber gar·
vnd moͤhten vns die rosen also schone sin beliben·
seht ir wurde vil lihte mir ein kranz·
wan ir glanz·
habent mir mine^{[WS 1]} swere vil vertriben·

Dú heide hat verbluͤt·
die rosen tolden risent vaste nider·
dc machet ir dú sorge die si zv̊ dem rifen hat·
wie sere si dc mvͤt·
her^{[WS 2]} aucholf kumet der svmer iemer wider·
si grůnet ane sinem danc dc si aber schone stat·
eý wie es gisel da mit tanze richen sol·
seht des hilfet perihtel iv́tel irmengart·
eberhart·
der gat an ir hant so ist im wol·

ICh kom an ein stat·
entrúwen da vand ich húbescher kinde vil·
die heten einen tanz· der wc dem flisse^{[WS 3]} gar zebreit·
zv̊ einer^{[WS 4]} ich getrat·
ir mv̊ter sprach wc ob ich des niht wil·
dc ir mit ir runet we dc ir zeriwen seit·
ir lat si mit genaden zechen anderthalben hin·
ir seht wol dc si mit ú niht runen kan·
aller man·
gat si fri die wil ich lebendic bin·

Mv̊ter zúrnet niht·
ia mach ich im dc beiten gar zelanc·
vnd beit^{[WS 5]} er vnz morgen· so mvͤst ich michs doch verdagen·
swenne in min ǒge an siht·
von im treit mich aller min gedanc·
dc tůt mir not· wan ich wart vert wol dvrh in zerslagen^{[WS 6]}·
frowe nv wis im dvrh minen willen gram·
ich tv̊n sam·
ia ist is der den ie min lip versprach·

Min schimphen half an ir·
do si zornes mv̊tes wider want·
do braht si mich innen dc ir hassen was ein trǒn·
gefrúnde wurden wir·
si gie den tac vil schone an miner hant·
die wile ich bi dem tanze^{[WS 7]} was· des nam min matze gǒm·
si sprach frowe ir tv̊t sin niht ir komt sin in grossen nît·
mit der rede kvnde si irs verbieten nie·
vf dú knie·
braht mich dú selbe dirn sit·

Ich sorge hinder mich·
wie ich iemer min helfe an ir bewar·
ich weis wol si gedenket min in swelher masse es si·
si sv́ndet anders sich·
wan ich mit grosser trúwe von ir var·
ob ich getorste ich were ir zallen ziten gerne bi·
ich wider sitze dem salman in des handen si da stat·
er sel sich anderthalben danne ich gebit·
solhen sit·
man in miner pharre hat·

Anmerkungen (Wikisource)

1. Vorlage: mne.
2. Vorlage: er.
3. Vorlage: flis.
4. Vorlage: ein.
5. Vorlage: beit.
6. Vorlage: zerſlagen nah.
7. Vorlage: taze.