Mir tůt endeliche we (Mit originalen Lettern)

Mir tůt endeliche we·
dc den winter nieman des erwenden mag·
er twinget vns abe·
beide blv̊mē vn̄ kle·
vn̄ dar zv̊ vil mangē wunnēclichē tag·
daſt min vngehabe·
die beginnēt aber iarlanc truͤbē
hin geſcheidē iſt ir zil·
bikel ſpil·
wil ſich aber in den ſtvben vͤben·

Des ſol her kv̊nze meiſt̾ ſin·
der v̾bútet lachen ſpꝛechen winkel ſehen·
daſt dvr in getan·
des erſmieret itelin·
ach ach der mag an ir hant vil we geſchehē·
des ich ſoꝛge han·
ſi wart húre wunt in einē vinger·
dos ir mvͤmel gerſtē ſneit·
dc iſt mir leit·
trut her kv̊nze ſlaht ſi deſte ring̾·

Hie bi ſvln wir des gedagen·
reden wir vō dien kindē die ſint gebettē·
vf den kovenanz·
gepe ſols in allen ſagē·
diemv̊t giſel ſvln da mit ein andern trettē·
michel wart der tanz·
bele vn̄ elle gent da mit ein ander·
ſam dc ſelbe metzel tv̊t·
wendelmv̊t·
wergot ruͤfen vns kúnzen dvr dú lander·

Sage ir das der man iſt hie·
dc ſi ir kleines roͤkelin vn̄ ir mantel trage·
welle ſi in geſehen·
deſ hat ſi gewinſchet ie·
nv iſt es aber komen vf die virtage·
nv laſ ſis geſchehen·
heis ſi dc ſir in ir gvͤchel bīde·
mir iſt lieber kvmt ſi her·
danne ob er
ſi da heime ī ſwacher wete vinde·

Kv́nze lang̾ niht enbeit·
ſi gienge dar ir wendelmv̊t gebot·
da hin wc ir gach·
vil ſchiere hat ſi ſich an geleit·
beide ſitē waren ir von ſiden rot·
ein lútzel gieng ir nach·
ſwer dc lant nach wibē gar dvrh fuͤre·
der dekeiner gvnde ich bas·
nv wiſſēt dc·
miner liebē mv̊ter zeiner ſnuͤre·

Hia wie wol ſi mir geviel·
do ich rehte erblihte wie ſi wc getan·
val wc ir dc har·
vn̄ ir roſevarwer triel·
do bat ich die ſchonē zv̊ mir ſitzen gan·
ſi ſpꝛach in getar·
mir iſt v̾bottē dc ich mit ieman rvne·
noch zv̊ zú niht ſitzen ſol·
nv tv̊t ſo wol·
vn̄ vꝛagt heiligē doꝛt bi fridervne·

Heiligē fragē ich began·
wer dien kleinen kindē hete ir froͤide erwert·
daſ tet ſi mir kvnt·
da iſt metzel ſchuldig an·
vō der mir vil manig bvngel iſt beſchert·
alſo ſpꝛach kv́nigvnt·
dc tv̊t ſi vns zer kilchen vn̄ zer gaſſē·
dc vnſ allē machet woꝛt·
hie vn̄ doꝛt·
vō rehte ſvln wir ſi dꝛvmbe haſſen·