Mir tůt endeliche we (Mit aufgelösten Abbreviaturen)

Mir tůt endeliche we·
dc den winter nieman des erwenden mag·
er twinget vns abe·
beide blv̊men vnd kle·
vnd dar zv̊ vil mangen wunnenclichen tag·
dast min vngehabe·
die beginnent aber iarlanc truͤben
hin gescheiden ist ir zil·
bikel spil·
wil sich aber in den stvben vͤben·

Des sol her kv̊nze meister sin·
der verbútet lachen sprechen winkel sehen·
dast dvr in getan·
des ersmieret itelin·
ach ach der mag an ir hant vil we geschehen·
des ich sorge han·
si wart húre wunt in einem vinger·
dos ir mvͤmel gersten sneit·
dc ist mir leit·
trut her kv̊nze slaht si deste ringer·

Hie bi svln wir des gedagen·
reden wir von dien kinden die sint gebetten·
vf den kovenanz·
gepe sols in allen sagen·
diemv̊t gisel svln da mit ein andern tretten·
michel wart der tanz·
bele vnd elle gent da mit ein ander·
sam dc selbe metzel tv̊t·
wendelmv̊t·
wergot ruͤfen vns kúnzen dvr dú lander·

Sage ir das der man ist hie·
dc si ir kleines roͤkelin vnd ir mantel trage·
welle si in gesehen·
des hat si gewinschet ie·
nv ist es aber komen vf die virtage·
nv las sis geschehen·
heis si dc sir in ir gvͤchel binde·
mir ist lieber kvmt si her·
danne ob er
si da heime in swacher wete vinde·

Kv́nze langer niht enbeit·
si gienge dar ir wendelmv̊t gebot·
da hin wc ir gach·
vil schiere hat si sich an geleit·
beide siten waren ir von siden rot·
ein lútzel gieng ir nach·
swer dc lant nach wiben gar dvrh fuͤre·
der dekeiner gvnde ich bas·
nv wissent dc·
miner lieben mv̊ter zeiner snuͤre·

Hia wie wol si mir geviel·
do ich rehte erblihte wie si wc getan·
val wc ir dc har·
vnd ir rosevarwer triel·
do bat ich die schonen zv̊ mir sitzen gan·
si sprach in getar·
mir ist verbotten dc ich mit ieman rvne·
noch zv̊ zú niht sitzen sol·
nv tv̊t so wol·
vnd vragt heiligen dort bi fridervne·

Heiligen fragen ich began·
wer dien kleinen kinden hete ir froͤide erwert·
das tet si mir kvnt·
da ist metzel schuldig an·
von der mir vil manig bvngel ist beschert·
also sprach kv́nigvnt·
dc tv̊t si vns zer kilchen vnd zer gassen·
dc vns allen machet wort·
hie vnd dort·
von rehte svln wir si drvmbe hassen·