Min mv̊t der mv̊s stigen iemer

Min mv̊t der mv̊s stigen iemer·
da von dc mir wúnschen tůt so wol·
des wil ich getruren niemer·
mich tv̊t wúnschen ofte froͤiden vol·
da von wil ich gerne wúnschen vil·
wan ich han von svͤssen wúnschen
ofte wunnebernder froͤiden spil·

Min lip der lag núlich eine·
vnd wúnschte nach der frowen min·
dc si dv́ vil svͤsse reine·
mit ir willen solde bi mir sin·
von dem wunsche ein wunder mir geschah·
dc ich die vil minneklichen
mit des herzen ougen bi mir sach·

Do ich si mit wúnschen brahte·
zv̊ mir also nahe ich wart fro·
alzehant min lip gedahte·
mit ir froͤiden vil svs vnd so·
mir wart fúr war nie mer also wol·
als mir da was mit der svͤssen·
da von ich vil gerne wúnschen sol·

Zv̊ vns kam dú werdú minne·
vnd slos vns beide vaste in ein·
ich vnd si wir wurden inne·
wol wie minne flihtet arme vnd bein·
vnd wie si gemachet dc ein wip·
vnd ein man von herzeklicher
liebe werdent niht niwan ein lip·

Swa dú minne zeinem libe·
machet einen man vnd ein gv̊t wip·
wol dem manne wol dem wibe·
dc mv̊s sin ein minne svͤsser lip·
vnd ein lip der mange wunne hat·
es ist gar ein himelriche
da ein lieb mit liebe vmbe gat·

ICh bin also minnewise·
vnd ist mir so rehte liep ein wip·
dc ich in dem paradýse
nit so gerne wisse minnen lip·
als da ich der gv̊ten solde sehen·
in ir ougen minneklichen
da moͤhte lieplich wunder mir geschehen·

Siht ein wib in mannes ǒgen·
dc si des erlat ir minne niht·
vnd er ir hin wider tǒgen·
in ir liehten spilndú ǒgen siht·
da mv̊s von der liebe me geschehen·
gvͤtlich trúten vnd kv́ssen
dannoch vil· des ich niht tar geiehen·