Mich mv̊t dc winde kalt (Mit originalen Lettern)

Mich mv̊t dc winde kalt·
mit gewalt·
manicvalt·
hant^{[WS 1]} v̾derbet den walt·
vn̄ des winders twīgen·
des klage ich den gruͤnen kle·
iarlanc me·
dc der ſne·
tůt den kleinen vogelin we·
dc ſi niht en ſingē·
ich klage ouch dc des meien blůt·
mv̊s ſo gar v̾ſwinden·
dc den iv̄gen vnſanfte tůt·
bi der gruͤnen lindē·
dar ich meien wc gegan·
richē wan·
ich des han·
da vant ich die gv̊ten ſtan·
voꝛ den ivngē kindē·

Dú reine gv̊te iſt ſo gar·
ſchon gevar·
balde hv̊b ich mich dar·
dvrh die liebē gv̊te·
ſi het geſchúrzet ir gewāt·
mit ir hant·
des ein lant·
vō ir ſchoͤne wirt bekant·
got ſi wol behvͤte·
liebes h̾ze dv ſolt leben·
ſchone ī minē libe·
dv kanſt mir wol froͤide gebē·
ſendeſ leit v̾tribe·
vō ir zinzelehtē bꝛvſt·
kumt gelvſt·
da dv mvſt·
ir mvnt voꝛ liebe hā gekvſt·
dē mīneklichē wibe·

Ein reinú frowe wol getan·
dv́ ſol lan·
irn wan·
zallē zitē ere han·
ſi hvͤte ſich an allē oꝛtē·
iſt ſi dāne alſo gemv̊t·
dc ſi tv̊t
alles gv̊t·
vn̄ ir ere hat behv̊t·
ſi get ze der wūne poꝛtē·
dv́ da gegē ir offen ſtat·
ī ſo richer wende·
wol ir dú die kúſche hat·
mit ſo wiſſer hēde·
wol ir dú dc kúſche kleit·
alſo bꝛeit·
an geleit·
der wirt froͤide vil bereit·
iemer mer an ende·

Anmerkungen (Wikisource)

1. Vorlage: hat.