Mich mv̊t dc winde kalt (Mit aufgelösten Abbreviaturen)

Mich mv̊t dc winde kalt·
mit gewalt·
manicvalt·
hant^{[WS 1]} verderbet den walt·
vnd des winders twingen·
des klage ich den gruͤnen kle·
iarlanc me·
dc der sne·
tůt den kleinen vogelin we·
dc si niht en singen·
ich klage ouch dc des meien blůt·
mv̊s so gar verswinden·
dc den iv̄gen vnsanfte tůt·
bi der gruͤnen linden·
dar ich meien wc gegan·
richen wan·
ich des han·
da vant ich die gv̊ten stan·
vor den ivngen kinden·

Dú reine gv̊te ist so gar·
schon gevar·
balde hv̊b ich mich dar·
dvrh die lieben gv̊te·
si het geschúrzet ir gewant·
mit ir hant·
des ein lant·
von ir schoͤne wirt bekant·
got si wol behvͤte·
liebes herze dv solt leben·
schone in minem libe·
dv kanst mir wol froͤide geben·
sendes leit vertribe·
von ir zinzelehten brvst·
kumt gelvst·
da dv mvst·
ir mvnt vor liebe han gekvst·
dem minneklichen wibe·

Ein reinú frowe wol getan·
dv́ sol lan·
irn wan·
zallen ziten ere han·
si hvͤte sich an allen orten·
ist si danne also gemv̊t·
dc si tv̊t
alles gv̊t·
vnd ir ere hat behv̊t·
si get ze der wunne porten·
dv́ da gegen ir offen stat·
in so richer wende·
wol ir dú die kúsche hat·
mit so wisser hende·
wol ir dú dc kúsche kleit·
also breit·
an geleit·
der wirt froͤide vil bereit·
iemer mer an ende·

Anmerkungen (Wikisource)

1. Vorlage: hat.