Komen ist der winter kalt· der vil manig herze hat erschreket

Komen ist der winter kalt·
der vil manig herze hat erschreket·
da e stůnt der gruͤne walt·
dc ist nv mit durren rise besteket·
dv́ heide stat ir varwe bar·
der anger al der blv̊men schar·
die rifen sint gevallen dar·
des hat sich des meien zit enbleket·
Sol ich tvmber disen kvmber iemer tragen·
dc mv̊s ich klagen·

Was klage ich des meien blv̊t·
die rifiere die vil liehten ǒwen·
wan klage ich niht minen mv̊t·
den mir mit geberden hat verhowen·
ein wib dv́ vil genaden hat·
swie si mich doch dar ane lat·
wie zimt ir selhiv missetat·
sol man mich in leide lange schowen·
Sol ich tvmber disen kvmber iemer tragen·
dc mv̊s ich klagen·^{[WS 1]}

Herze lieb vnd herzeleit·
trage ich doch mit vngelicher wage·
swc min herze liebe treit·
seht dc widerwigt min frowe trage·
swc aber ich leides han von ir·
dc wiget si vollekliche mir·
min leit dc ist ir herzen gir·
swie ich doch mit dienste ir hulden lage·
Sol ich tvmber disen kvmber iemer tragen·
dc mv̊s ich klagen·^{[WS 2]}

IR gebaren minneklich·
kan min hohgemvͤte wol geswache·
vnd ir lachen inneI klich·
dc kan si so rehte svͤsse machen·
ir spiegel liehten ǒgen klar·
ir roter mvnt mich svnderbar·
verderben wil dast leider war·
wenne wil mir den zefroͤden lachen·
Sol ich tvmber disen kvmber iemer tragen·
dc mv̊s ich klagen·^{[WS 3]}

Mir tůt inneklichen we·
mv̊s ich ir das kv́nden mit gesange·
wil si dc ich singe me·
der ich han gesvngen her vil lange·
so gebe mir lacheliche ir grůs·
zehant so wirt mir sorge bůs·
vnd nige ir nider vnz vf den fůs·
frowe fuͤge dc min leit zergange·
Sol ich tvmber disen kvmber iemer tragen·
dc mv̊s ich klagen·^{[WS 4]}

Anmerkungen (Wikisource)

1. Vorlage: Sol ich tvmb̾·
2. Vorlage: Sol ich tvmb̾·
3. Vorlage: Sol ich tvmb̾·
4. Vorlage: Sol ich tvmb̾·