Komen iſt der wint̾ kalt· der vil manig h̾ze hat erſchꝛeket

Komen iſt der wint̾ kalt·
der vil manig h̾ze hat erſchꝛeket·
da e ſtůnt der gruͤne walt·
dc iſt nv mit durrē riſe beſteket·
dv́ heide ſtat ir varwe bar·
d̾ anger al der blv̊mē ſchar·
die rifen ſīt gevallē dar·
deſ hat ſich des meien zit enbleket·
Sol ich tvmber diſen kvmb̾ iemer tragē·
dc mv̊s ich klagē·

Was klage ich des meien blv̊t·
die rifiere die vil liehtē ǒwē·
wā klage ich niht minē mv̊t·
den mir mit geb̾dē hat v̾howē·
ein wib dv́ vil genadē hat·
ſwie ſi mich doch dar ane lat·
wie zimt ir ſelhiv miſſetat·
ſol mā mich in leide lange ſchowen·
Sol ich tvmber diſen kvmb̾ iemer tragē·
dc mv̊s ich klagē·^{[WS 1]}

Herze lieb vn̄ h̾zeleit·
trage ich doch mit vngelicher wage·
ſwc min h̾ze liebe treit·
ſeht dc widerwigt min frowe trage·
ſwc aber ich leides han vō ir·
dc wiget ſi vollekliche mir·
min leit dc iſt ir h̾zen gir·
ſwie ich doch mit dienſte ir hulden lage·
Sol ich tvmber diſen kvmb̾ iemer tragē·
dc mv̊s ich klagē·^{[WS 2]}

IR gebarē mīneklich·
kan min hohgemvͤte wol geſwache·
vn̄ ir lachē inneI klich·
dc kan ſi ſo rehte ſvͤſſe machē·
ir ſpiegel liehten ǒgē klar·
ir rot̾ mvnt mich ſvnderbar·
v̾derben wil daſt leid̾ war·
wēne wil mir den zefroͤdē lachen·
Sol ich tvmber diſen kvmb̾ iemer tragē·
dc mv̊s ich klagē·^{[WS 3]}

Mir tůt inneklichē we·
mv̊s ich ir das kv́nden mit geſange·
wil ſi dc ich ſinge me·
der ich han geſvngē her vil lāge·
ſo gebe mir lacheliche ir grůs·
zehāt ſo wirt mir ſoꝛge bůs·
vn̄ nige ir nider vnz vf den fůs·
frowe fuͤge dc min leit zergange·
Sol ich tvmber diſen kvmb̾ iemer tragē·
dc mv̊s ich klagē·^{[WS 4]}

Anmerkungen (Wikisource)

1. Vorlage: Sol ich tvmb̾·
2. Vorlage: Sol ich tvmb̾·
3. Vorlage: Sol ich tvmb̾·
4. Vorlage: Sol ich tvmb̾·