Kint ir warnent úch der slitten vf dc ýs

Kint ir warnent úch der slitten vf dc ýs·
vns kvmt der leide winter kalt·
der v̄s vil der wunnenklichen blv̊men hat benomen·
des ist nv vil manger linde ir tolde gris·
vnbesvngen ist der walt·
dc ist alles von des rifen vngenaden komen·
mvgt ir schǒwen wie hat sich dú heide erzogen·
dú ist von sinen schulden val·
dar zv̊ sint die nahtegal
alle ir weg geflogen·

Hie bi vor do stv̊nt vil schone mir min har·
vmbe vnd vmbe gie der span·
des vergas ich sit man mich ein hus besorgen hies·
saltz vnd korn kǒfe ich dur dc iar·
we was hat ich dem getan·
der mich tvmben man· von erst in disen kvmber sties·
mine schvlde waren kleine wider in·
mine fluͤche sint niht smal·
swenne ich da zerúwental
vnberaten bin·

Wol bedorfte ich miner wiser frúnde rat·
vmbe ein dink als ich úch sage·
war dú kint mit froͤiden disen winter solden gan·
megenwart· der witen stvben eine hat·
obs iv allen wol behage·
da svln wir den govenanz den virtag inne han·
es ist siner tohter wille komen wir dar·
heis sis alle ein ander sagen·
einen tanz alvmbe die schragen·
prvͤfet engelmar·

Wer danne nach kúnegvnde ge des werden enein·
der wc ie nach tanze we·
es wirt vns verwissen· ist dc man ir niht enseit·
goͤttelint nv ga dahin vnd sage in zwein·
sprich dc elle mit vns ge·
es ist zwischen mir vnd ir ein genziv sicherheit·
kint vergis dvr nieman hedewige da·
heis si mit ein andern gan·
einen sitte si svn lan·
binden vf die bra·

Ich gebot den ivngen wiben vber al·
die in der mâsse wellent sin·
dc si hohgemv̊ten mannen holdes herze wellen tragen·
ziehen vornan hoch vnd hinden hin zetal·
deken wol das nekelin·
war zv̊ sol ein tehter oder ein gollier vmbe den kragen·
dú wib sint des hǒbtes sicher her gewesen·
dc eht in dc nieman brach·
swas in anderswa geschach·
des sintz ǒch genesen·

Megenwart nach goͤttelin wolde gan·
des hat engelmar gedaht·
wils úch niht verdriessen ich sage iv das ende gar·
eberhart· der meier mv̊st es vnder stan·
der wart an die sv̊ne braht·
anders were ir beider hant einandern in dem har·
zwein hoͤnen gantzen giengen si gelich·
gegen ein andren allen tac·
der hie vor des sanges pflag·
dc was friderich·

Eppe zvhte gepen gerbreht ab der hant·
des half im sin dreschel stab·
das geschv̊f mit siner rúte meister adelger·
dc wc alles vmb ein ei dc růpreht vant·
in weis ob ims der tiefel gab·
da mite stv̊nt er alles dort vnd droͤite ienvnt her·
eppe der was beide zornig vnd kal·
vppeclichen sprach er traz·
růpreht warf ims an den glatz·
dc es ran zetal·