Kint ir warnēt úch der ſlitten vf dc ýſ

Kint ir warnēt úch der ſlitten vf dc ýſ·
vns kvmt der leide winter kalt·
der v̄s vil der wunnēklichē blv̊mē hat benomen·
des iſt nv vil manger linde ir tolde gris·
vnbeſvngē iſt der walt·
dc iſt alles vō des rifē vngenadē komen·
mvgt ir ſchǒwē wie hat ſich dú heide erzogen·
dú iſt vō ſinē ſchuldē val·
dar zv̊ ſint die nahtegal
alle ir weg geflogen·

Hie bi voꝛ do ſtv̊nt vil ſchone mir min har·
vmbe vn̄ vmbe gie der ſpan·
des vergas ich ſit man mich ein hus beſoꝛgē hies·
ſaltz vn̄ koꝛn kǒfe ich dur dc iar·
we was hat ich dem getan·
der mich tvmbē man· vō erſt in diſen kvmber ſties·
mine ſchvlde warē kleine wider in·
mine fluͤche ſint niht ſmal·
ſwenne ich da zerúwētal
vnberaten bin·

Wol bedoꝛfte ich miner wiſer frúnde rat·
vmbe ein dink als ich úch ſage·
war dú kint mit froͤiden diſen winter ſolden gan·
megenwart· der witē ſtvben eine hat·
obs iv allen wol behage·
da ſvln wir den govenanz den virtag inne han·
es iſt ſiner tohter wille komen wir dar·
heis ſis alle ein ander ſagen·
einē tanz alvmbe die ſchꝛagen·
pꝛvͤfet engelmar·

Wer danne nach kúnegvnde ge deſ w̾den enein·
der wc ie nach tanze we·
es wirt vns v̾wiſſen· iſt dc man ir niht enſeit·
goͤttelint nv ga dahin vn̄ ſage in zwein·
ſṕch dc elle mit vns ge·
es iſt zwiſchē mir vn̄ ir ein genziv ſicherheit·
kint v̾gis dvr niemā hedewige da·
heis ſi mit ein and̾n gan·
einē ſitte ſi ſvn lan·
bindē vf die bꝛa·

Ich gebot den ivngē wibē vber al·
die in der mâſſe wellent ſin·
dc ſi hohgemv̊tē mannen holdes h̾ze wellē tragen·
ziehen voꝛnan hoch vn̄ hinden hin zetal·
deken wol das nekelin·
war zv̊ ſol ein tehter oder ein gollier vmbe den kragen·
dú wib ſīt des hǒbtes ſicher her geweſen·
dc eht in dc nieman bꝛach·
ſwas in anderſwa geſchach·
des ſintz ǒch geneſen·

Megenwart nach goͤttelin wolde gan·
des hat engelmar gedaht·
wils úch niht v̾dꝛieſſen ich ſage iv das ende gar·
eberhart· der meier mv̊ſt es vnder ſtan·
der wart an die ſv̊ne bꝛaht·
anders were ir beider hant einandern in dem har·
zweī hoͤnen gantzē giengē ſi gelich·
gegen ein andꝛen allen tac·
der hie voꝛ deſ ſanges pflag·
dc was friderich·

Eppe zvhte gepen gerbꝛeht ab der hāt·
des half im ſin dꝛeſchel ſtab·
das geſchv̊f mit ſiner rúte meiſt̾ adelger·
dc wc alles vmb ein ei dc růpꝛeht vant·
in weis ob ims der tiefel gab·
da mite ſtv̊nt er alles doꝛt vn̄ dꝛoͤite ienvnt her·
eppe der was beide zoꝛnig vn̄ kal·
vppeclichē ſpꝛach er traz·
růpꝛeht warf ims an dē glatz·
dc es ran zetal·