Im Aprölla 1879

Im Aprölla 1879.

Wear s Grüa’ verroicht, dea preis i wäger glückle,
Ihm scheint ussam kräutergrüana Gätle
De geali Millstöck^[1] rous so appatickle
Wia d Ochsa’auga dinna im Spinätle.

5

Deam schlaet d Finka wieder in de Boscha,

Derzua noh d Amsla, d Droschtla, d Nachtigalla!
Wia heancht^[2] as doch so schö’ und koscht koin Groscha,
Weam sott a sötti Musing gauh’ it gfalla?

Beifalter siehscht dur d Lüfta luschtig fliaga,

10

Pfôgaugete,^[3] Blôgflüglate^[4] und Schiller,

Und hunta uff de Bluama dött se wiaga
Im Sonnaschei’ de kleini weißi Müller.^[5]

I aber los uff sealli Gläsla oi’zig,
Wo an de Fäda klinglat duß im Gata

15

Und s Spatzavolk verjaicha müaßet, s koi’zig^[6] -

Se gant au gar en so en Klang, en zata.

Wenn d Leut schau’ über meine Thema’^[7] lachet,
I hair dô doch, was diesi^[8] äll it hairet,
Weisingena,^[9] dia koinar nôchi machet

20

Und dia wia s Hoimwaih miar as Heaz versaihret.^[10]

Doch zruck in d Wealt! Ka’n i des Gläslaklingla
Und was as saga will jô doch it fassa!
Jetz hair i Zugamichla d Säagas^[11] dengla
Und Schreinersmartis Karra goura^[12] uff der Gassa.

---

1. Löwenzahn.
2. Tönt.
3. Pfauenaugen.
4. Blaugeflügelte.
5. Kohlweißlinge.
6. Nichtsnutzig.
7. Phantasien.
8. Jene.
9. Weisen.
10. Verwunden.
11. Sense.
12. Knarren.