Gv̊t wib miner froͤiden lere

Gv̊t wib miner froͤiden lere·
tugende riche frowe min·
wisse dc mich iamert^{[WS 1]} sere·
in das reine herze din·
da solt dv mih hvsen in·
in dem svͤssen paradýs ich gerne bin·

Da hat inne gůt gemvͤte·
mit der wipheit froͤide vil·
din vil hohgelopte gvͤten·
spilt da eren froͤiden spil·
mit den tugenden zaller zit·
wol mir wol ob mir din gvͤte hvs da git·

Tv̊ vf ich klopfe an mit worten·
la mich in so bist dv gv̊t·
slús vf schiere mir die porten·
bi mir hie ist hoher mv̊t·
der ǒch gerne dienet dir·
erst dir holt mit trúwen dc gelǒbe mir·

Er hat sin vil wol genossen·
dc er dir ist also holt·
ich han in zv̊ dir geslossen·
in min herze da er dolt·
wunnebernder froͤide vil·
er tv̊t dir da liebe frowe swc er wil·

Hoher mv̊t gewan mit wibe·
nie so mange froͤide gros·
ich han in bi dinem libe·
ofte fvnden deke blos·
da kvst er wol tusent stvnt·
din klein vel hitze roten svͤssen mvnt·

Gvͤtlich trúten kv́ssen sv̊sse·
drvken brvst an brústelin·
dise^{[WS 2]} liebe sv̊sse vnmv̊sse·
tribet in dem herzen min·
mit dir reine frowe gv̊t·
din gv̊t frúnt min minnegernder hoher mv̊t·

Als er im ein froͤide tihtet·
in dem herzen min mit dir·
arme vnd bein er danne flihtet·
im vnd dir dir vnd mir·
hin vnd her svs vnd so·
das tůt herzeklichen wol vnd machet fro·

Anmerkungen (Wikisource)

1. Vorlage: iam̾.
2. Vorlage: diſv́.