Froͤit úch wol gemv̊ten leien

Froͤit úch wol gemv̊ten leien·
gegen dem wunneklichen svͤssen meien·
dú zit ist zefroͤiden wol gestalt·
froͤit úch ivnge vnd alt·
man hoͤrt vf dem blvͤnden rise·
vogel singen in ir besten wise·
vor in allen doͤnet nahtegal·
lobelich ir schal·
anger grůnet vnd dú liehte heide·
des stet wunneklich ir ǒgenweide·
wan siht allenthalben vf dem plan·
vil der blv̊men stan·

Helfent mir die zit enpfahen·
wolgemv̊ten lat úchs niht versmahen·
wir son kleinne sorgen vmbe gůt·
swanne vns húge der mv̊t·
wir son tanzen wir son springen·
wir son froͤlich reigen wir son singen·
wir son hohgemvͤte vnd lieben wan·
vf gedingen han·
lant die súfter in vnfroͤiden sterben·
wir son nach gelúke in froͤiden werben·
vnd arbeiten gůt vnd ǒch den lib·
dú werden wib·

Wer kan froͤlich fro beliben·
wan bi reinen minneklichen wiben·
wer kan wenden sendes herzen svht·
wan ir wiblich zuht·
wer kan truren bas verswachen·
danne ir zartes roͤselehtes lachen·
wer tůt senden man von sorge erlost·
wan ir wiblich trôst·
wer kan mannes minne wunden heilen·
wer kann froͤide in herzen lieblich teilen·
nieman wan dú tvgentlichen wib·
selig si ir lib·

Wir son wibes namen eren·
vnd ir lob mit hoher wirde meren·
da dú wibheit vnvermeilet si·
dú ist wandels frî·
we dem man der des gedenket·
dc er wib vnd wibes namen krenket·
der let vf sich beidú hie vnd dort·
sv́nde vnd lasters hort·
wibes name vnd wibes lib dú wunne·
zieren froͤide sam dú spilndú svnne·
wol gezieren vnd geschoͤnen mag·
einen svmertag·

Wer gesach ie creatúre·
bas gestalt vnd da bi so gehúre·
vnd so rehte minneclich gevar·
nach dem wunsche gar·
vnd so rehte schoͤne an schowe·
sam si ist min trut mins herzen frowe·
an der libe niemer ǒge ersiht·
wandelberes niht·
wol ir werden svͤssen ivngen iaren·
wer gesach ie wib so wol gebaren·
sam si tůt mins herzen heiles vunt·
rôt ist ir der munt·