Froͤit úch wol gemv̊tē leien

Froͤit úch wol gemv̊tē leien·
gegē dē wūneklichen ſvͤſſen meien·
dú zit iſt zefroͤidē wol geſtalt·
froͤit úch ivnge vn̄ alt·
man hoͤꝛt vf dem blvͤndē riſe·
vogel ſingē in ir beſtē wiſe·
voꝛ in allē doͤnet nahtegal·
lobelich ir ſchal·
anger grůnet vn̄ dú liehte heide·
deſ ſtet wūneklich ir ǒgenweide·
wan ſiht allenthalbē vf dē plan·
vil der blv̊mē ſtan·

Helfent mir die zit enpfahen·
wolgemv̊tē lat úchs niht v̾ſmahē·
wir ſon kleīne ſoꝛgē vmbe gůt·
ſwāne vns húge der mv̊t·
wir ſon tanzen wir ſon ſpꝛingē·
wir ſon froͤlich reigē wir ſon ſingē·
wir ſon hohgemvͤte vn̄ liebē wā·
vf gedingē han·
lant die ſúfter in vnfroͤiden ſterben·
wir ſon nach gelúke in froͤidē w̾ben·
vn̄ arbeitē gůt vn̄ ǒch dē lib·
dú w̾den wib·

Wer kan froͤlich fro belibē·
wan bi reinen mīneklichē wibē·
wer kan wēdē ſendeſ h̾zen ſvht·
wan ir wiblich zuht·
wer kan trurē bas v̾ſwachē·
dāne ir zartes roͤſelehtes lachē·
wer tůt ſendē man vō ſoꝛge erloſt·
wan ir wiblich trôſt·
wer kan mānes mīne wūdē heilē·
wer kann froͤide in h̾zen lieblich teilen·
nieman wan dú tvgentlichen wib·
ſelig ſi ir lib·

Wir ſon wibes namē eren·
vn̄ ir lob mit hoher wirde merē·
da dú wibheit vnv̾meilet ſi·
dú iſt wandels frî·
we dem man d̾ des gedenket·
dc er wib vn̄ wibeſ namē krenket·
d̾ let vf ſich beidú hie vn̄ doꝛt·
ſv́nde vn̄ laſterſ hoꝛt·
wibeſ name vn̄ wibes lib dú wūne·
zieren froͤide ſam dú ſpilndú ſvnne·
wol gezierē vn̄ geſchoͤnē mag·
einē ſvm̾tag·

Wer geſach ie creatúre·
bas geſtalt vn̄ da bi ſo gehúre·
vn̄ ſo rehte mīneclich gevar·
nach dem wunſche gar·
vn̄ ſo rehte ſchoͤne an ſchowe·
ſam ſi iſt min trut mins h̾zen frowe·
an der libe niemer ǒge erſiht·
wandelberes niht·
wol ir w̾den ſvͤſſen ivngē iaren·
wer geſach ie wib ſo wol gebarē·
ſam ſi tůt mins h̾zē heiles vunt·
rôt iſt ir d̾ munt·