Die liehten liebe svmertage reine
[278v]
Die liehten liebe svmertage reine·
die sint zergan·
owe leider von der truͤben zit·
da von beleib ich aller sorgen eine·
dvr den wan·
der mir belibet vnd nahen lit·
dast ein kint an die ich mine sinne·
gewendet han· erwirbe ich sine minne·
so bin ich geil·
vnd han ze der werlde den besten teil·
Das ist ein wib an die ich han gewendet·
die mine tage·
an der vinde ich niht wan kindes mv̊t·
mich[WS 1] hat min herze lange dar gesendet·
dc ringe wage·
ir mv̊t als er noh húre tůt·
het ir lip nach minem willen gvͤte·
si were ein wip dv́ mich von vngemvͤte·
wol schiede gar·
vnd ist des niht so singe ich aber dar·
Si ist vnuerborgen vnd da bi bescheiden·
dc ist vil war·
alle ir fůre ist von der gogelheit[WS 2]·
si kan sich lieben vnd nieman leiden·
al dvr dc iar·
da von ich ir tugende han geseit·
dvr dc wil ich ir minne gerne varen·
mir wc so wol ich sah si fro gebaren·
do ich bi ir was·
vnd ir habt dc hemde vntz sis gelas·
Do bat mich dú minnekliche singen·
den minen sanc·
des wc ich mit trúwen vil gemeit·
wan braht ir snuͤre si begvnde twingen
die runzen lanc·
[279r] ich was in dem halse niht bereit·
dc verstůnt dú gv̊te vil gefůge·
dc ich mich schampt si schanht mir mit dem krůge·
das mir dú kel·
wider wurde heiter vnd hel·
IR pirn most den trank ich also swinde·
des was si fro·
do sang ich vns beiden gar genv̊c·
vil zúhteklich sprach si zv̊ ir gesinde·
vil liebe also·
bring vns aber einen vollen krůc·
dc wir den tac hie mit froͤiden also verslîessen·
die brvnen nvsse mit ein ander bîssen·
do sprach dv́ dirn·
dar zv̊ schenke ich miner teigen pirn·