Die liehtē liebe ſvmertage reine

Die liehtē liebe ſvmertage reine·
die ſint zergan·
owe leider vō der truͤben zit·
da vō beleib ich aller ſoꝛgen eine·
dvr den wan·
der mir belibet vn̄ nahē lit·
daſt ein kint an die ich mine ſinne·
gewendet han· erwirbe ich ſine mīne·
ſo bin ich geil·
vn̄ han ze d̾ w̾lde den beſtē teil·

Das iſt ein wib an die ich han gewendet·
die mine tage·
an der vinde ich niht wan kindes mv̊t·
mich^{[WS 1]} hat min h̾ze lange dar geſendet·
dc ringe wage·
ir mv̊t als er noh húre tůt·
het ir lip nach minē willen gvͤte·
ſi w̾e ein wip dv́ mich vō vngemvͤte·
wol ſchiede gar·
vn̄ iſt des niht ſo ſinge ich aber dar·

Si iſt vnu̾boꝛgē vn̄ da bi beſcheidē·
dc iſt vil war·
alle ir fůre iſt vō der gogelheit^{[WS 2]}·
ſi kan ſich liebē vn̄ niemā leidē·
al dvr dc iar·
da vō ich ir tugēde han geſeit·
dvr dc wil ich ir minne g̾ne varen·
mir wc ſo wol ich ſah ſi fro gebarē·
do ich bi ir was·
vn̄ ir habt dc hemde vntz ſis gelas·

Do bat mich dú mīnekliche ſingē·
den minē ſanc·
des wc ich mit trúwen vil gemeit·
wā bꝛaht ir ſnuͤre ſi begvnde twingen
die runzē lanc·
ich was in dem halſe niht bereit·
dc v̾ſtůnt dú gv̊te vil gefůge·
dc ich mich ſchampt ſi ſchanht mir mit dem krůge·
das mir dú kel·
wider wurde heiter vn̄ hel·

IR pirn moſt den trank ich alſo ſwinde·
des was ſi fro·
do ſang ich vns beidē gar genv̊c·
vil zúhteklich ſpꝛach ſi zv̊ ir geſinde·
vil liebe alſo·
bꝛing vns aber einē vollē krůc·
dc wir den tac hie mit froͤidē alſo v̾ſlîeſſen·
die bꝛvnē nvſſe mit ein ander bîſſen·
do ſpꝛach dv́ dirn·
dar zv̊ ſchenke ich miner teigē pirn·

Anmerkungen (Wikisource)

1. Vorlage: ſich.
2. Vorlage: gvgelheit.