Die Schedelsche Weltchronik (deutsch):204

203 <<<Vorheriges Blatt	Die Schedelsche Weltchronik Blatt CCIIII	Nächstes Blatt>>> 205

unkorrigiert	Dieser Text wurde noch nicht Korrektur gelesen. Allgemeine Hinweise dazu findest du bei den Erklärungen über Bearbeitungsstände.

CCIII verso:

Das sechst alter

Orden der aynsidler sant Augustins

GWilielmus der heillig man ettwen hertzog zu aquitania vnd graff zu pictauia ist im iar des herren tawsent hundert lvii.^[1] in gallia an tugenten vnd wunderzaichen scheinper gewest. der von iugent auff von sant bernhart geleret wardt vnd ime den todt fu^er awgen setzet. der werlt geprengk verachtet vnd in ein große wu^eestnus gienge. vnd daselbst vnder sant augustins regel als ein volkomner diener cristi lebet. vnd do er nw in den gaistlichen stand kome ye ho^eher er denn in den eren was gewesen ye tieffer er sich demu^eetiget. vnd gleicher weiß als er dauor gepantzert wider die feind gefochten het. also wolt er in gott gekeret in eim pantzer an ploßen leib gelegt mit stettigem beten. wachen vnd fasten seinen leichnam peynnigen. darumb nicht allain vil werltlich person. sunder auch etliche bru^eedere diss ordens vnd andere komen zu ime als zu eim vater vnd aufrichter diss ordens[.] Als aber diser heillig man sahe das der orden der cistercienser in klainer zeit also fast zugenomen het vnd sein orden so gar in abfall vnd wu^eestnus komen was das schier kein anzaigung enicher gaistlichkeit darinn mer erschyne. do richtet er sein gemu^eet solchen seinen orden widerzeerquicken vnd brachte den mit mercklicher menig gaistlicher person in kurtzer zeit zu auffung also dz man ine einen pawere des ordens. vnd die personen desselben nach ime gwilielmitas nennet bis an die zeit babst innocentii des vierden do warden sie auß den wu^eestnussen in die stett gefordert. vnd nach hinlegung diss namens von demselben babst vnd seinen nachkomen sant augustins ainsidler genant. Diser Gwilielmus hat auß zugabe anastasii vnnd adriani der bebst nach der aynsidelschaft erstlich in den stetten zewonen angefangen vnd das erst closter zu Parys vnder dem tittel des petelns erpawt.

DRey sunnen sind diser zeit in dem monat septembris in dem nidergang beyeinander gesehen worden. vnd vber zwu^o stund gienge die mittler sunn nach verschwindung der andern zu rast. Deßgleichen sinnd auch in den nechsten iarn darnach drey monde erschynen. vnd in dem mittlern ein creu^etz zaichen. Dise gesihte warden von ettlichen außgelegt das sie zwitrachtigkeyt der cardinel in erwelung des babsts. vnd der churfu^ersten in wale eins ro^emischen ko^enigs bedeu^eteten als dann wider babst alexandrum (als hieuor gemeldt ist) vier bebst erkorn waren. deßhalben wz ein schwere zwayung. die weeret. xvii. iar. So waren diser zeit solche erdpidem. vnd sunderlich in syria vnd sicilia das sich land lewt vnnd stett erschu^etteren vnd verfielen.

JOhannes mesue ein artzt auß ko^enigclichem geschlecht damascenorum pu^ertig ist zu disen zeiten in hailung vnd ertzneyung der seu^echen vnd kranckheit hohberu^embt gewest. vnnd hat auß wissen der kunst der ertzney ettliche nu^etzliche bu^echer von allerlay ertzneyen vnd von irer natur. art. aigenschaft vnd vbung geschriben. vnd wiewol er auch ein buch von haylung vnd ertzneyung der seu^echen zebeschreiben vnd am hawbt angefangen het. yedoch als er bis an das hertz komen was do starb er.

JOhannes der carnotensisch bischoff. vnd sant Thoman dem cantuariensischen bischoff gar gehaym an schriftlicher wissenheit. lere vnd außsprechlichkeit hohberu^embt hat diser zeit in achtung vnd wirden wesende ettliche scho^en schriften gemacht vnd vnder andern des benanten sant Thomas leben emssigclich beschriben.

CCIV recto:

der werlt

Blat CCIIII

HArtmannus bischoff zu Brixen in dem Passawischen land geporn entzohe sich in anbegynn seiner iugent von der werlt vnd kome zu den geregelten chorherren sant Niclaßen zu Passaw. allda wuchße er auff in heilligem leben an gu^oten sytten vnnd lernung. Bischoff Cunrat zu Saltzburg setzet ine zu verwesung des closters daselbst. darnach empfienge er auff begerung margraff Leu^epolds zu o^esterreich an der Thonaw ein newe pflantzung zeregieren. Als er aber pald probst ward do peyniget er sein leichnamlein mit vil fasten. wachen vnd andern quelungen herttigclich vnd vbet sich gern in wercken der demu^eetigkeit. also nach absterben Reinberti des bischoffs zu Brixen wardt er mit gemayner wale der pfafheit zu bischoff daselbst erwelt. alda volbracht er sein leben in aller heilligkeit vnd wunderzaichen vnd enteu^eßert sich aller werltlicher vnd flaischlicher wollustperkeit vnd ergabe sich gantzen in gebette vnnd beschewlichkeit. vnd lebet also in ho^ehster massigkeit vnd wundergestrengem wesen. vnnd het vnder seinem klaid ein hareins hembd an. Er wardt von kaiser Friderichen fast geliebt vnd als ein vater vnd beichtiger alweg von ime geeret. vnd darumb des kaisers zorn gein babst alexandro durch ine gesenftigt. Zu derselben zeit leu^echteten zway o^elzweydlein in der kirchen gottes. Eberhart der ertzbischoff zu Saltzburg. vnd diser sant hartman bischoff zu Brixen. der alle sein zeit mit wachen vnd betten. mit beschewligkeit oder mit lesen verzeret. vnd gepott des hails gabe. vnd krieg richtet. vnnd starb zu letst vol tag in einem wasser bade zu wintter zeit. vnd was nach seinem seligen abschaid auß der werlt an vil wunderzaichen scheinper. vnd su^enderlich ist er ein getrewer nothelffer den schwangern frawen die in irer geperung sein hilff auß verdienst bey got anru^eeffen.

ALmericus der sechst ko^enig zu Iherusalem hat nach absterben Balduini des dritten seins bruders. xii. iar geregirt. vnd was ein gestrenng vnd vil gedechtnus wirdiger man. der dann mit den hayden vil vnd offt gefochten vnd derselben vil erschlagen hat. vnd hat Alexandriam die hawbtstatt in egypten (die Tiracumus Saladini des tu^erckischen ko^enigs verweser dem egyptischen Soldano mit betriegerey entzogen het) mit hartter belegerung bedrangt. also das die von Alexandria (die sich den cristen in keinen weg vnderwerffen wolten) sich an disen ko^enig Almerico ließen mit geding das sie durch ine widerumb in des Soldans gewalt gelangen solten. Dem nach empfienge diser Almericus ein mercklich groß gelt von dem Soldan vnd ließe ime alexandriam folgen. Als aber almericus verstund das der Soldan in denselben dingen betrieglichkeit suchet do belegeret er als ein großmu^eetig man die mechtigen statt Alkeyro. vnd empfieng doch darnach auß verlaytung eins falschen ratgeben von dem Soldan abermals gelt vnd zohe ab.

ALbertus ein beru^embter ritter wardt nach erlichem fechten mit marter bekro^enet.

ANßhelmus der Beluacens[i]sch bischoff ist diser zeyt nach heilligem leben vnd gu^otten sytten gestorben. bey des grabe warden ettliche lampen wunderperlich angezu^endt außgenomen eine darein ein wu^ochrer o^ele getan het[.]

PHilippus ko^enig zu franckreich des vorigen ko^enig ludwigs sun regiret. xliiii. iar. der zohe (als er ho^eret das Jherusalem widerumb verlorn wer) mit vil cristenlichen fu^ersten in syriam. als er nu mitsambt Richardo dem Englischen ko^enig fu^er Ptolomaidam komen. vnd darnach her widerumb gein Jherusalem ziehen wolten do begunden sie bede vmb das ko^enigreich Jherusalem miteinander zezancken. doch name sich Philippus einer kranckheit an vnd zohe haym vnd ließ Richardum hinder ime vnd verzeret sein vbrigs leben in heilliger vbung.

ELizabeth ein heillige closterfraw leu^echtet in sachßen land an wunderzaichen vnd hat auß englischer offenbarung wunderperliche gesiht beschriben. sunderlich ein buch der weg des herren genant.

↑ 1157 n. Chr.

[1] 1157 n. Chr.

[1]