Die Schedelsche Weltchronik (deutsch):051
| 050 <<<Vorheriges Blatt | Nächstes Blatt>>> 052 | |
 | ||
| fertig | Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
| |
L verso:
Benedab ein sun Tabreminon des suns ozion des koenigs Sirie machet Baasa den koenig israhel ein puentnus. nach verprechung derselben puentnus machet er ein andere puentnus mit aza dem konig iuda. als denn betruebten die konig Syrie das reich israhel etc.
Benedab der konig Syrie hat sein heer gesamelt vnd xxxij. konig zu helffernn gehabt vnd ist wider Achab den koenig israhel in einen streit komen. vnd der herr hat durch den propheten den syg vnd vberwindung fuerkuendet. das geschahe also vnd die veind flohen. do stercket sich der konig Syrie nach dem iar wideruemb mit eim heer gegen israhel kriegende in den talen. sprechende. dz die goetter der berg goetter israhel weren. daruemb warden sie vormals vberwunden. aber die heer Syrie warden bestritten vnd auß ine hundertausent erslagen. vnd. xvijm. vberbleibende sind in die stat geflohen vnnd von der nidergefalnen der stattmawr verdruckt worden. aber Benedab der koenig Syrie hat sich verporgen vnd potten mit harinen kleid angethan vnd mit aschen auff ire hawbter gestrewt zu achab gesendet vnd barmhertzigkeit begeret. die hat er ime bewisen vnd ine ledig gelassen. darumb hat ine ein prophet in entstelten klaid streflich zu red gehalten vnd ime vnder der gleichnus eins der ymant bey der pen des tods zu bewarung gegeben wer angezeigt. so er den des tods wirdigen Benedab hingelaßen het. das er vnnd das volck israhel fuer ine vergeen wuerden.
Azahel der konig Syrie wardt auß erheischung der verschuldung mit heimlichem gericht gottes zu einen konig Syrie gefuerdert die kinder israhel zepeinigen. vber disen waynet Heliseus weyssagende dz er ein kuenftiger konig Syrie sein vnd den von israhel vil vbels thun wurdt der auch von wegen der suend hieu von dem herren in alle erden galaad. gad. ruben[1] vnd manasse gesendet wardt. vnd hat eine grosse plag gethan alle die tag Joathas. Aber Joas sein sun hat durch gunst gottes des herren die stett genomen von der hand Benadad des suns Azahel nach dem todt Azael.
Benedad ist der sun Azaelis. aber Joas der Joathas sun der konig israhel name von der hand Benedad die stett die Azahel sein vater auß dem gewalt Joathas im krieg gewonen het. dann Joas erschluge ine zu dreyen malen.
Ioiada was ein treffenlicher man der verhindert die Athaliam das sie nit herschet vber iudam vnd setzet den Joas des Jorams sun fuer sie. Diser allein hat nach moysen (als man liset) hundert dreyssig iar gelebt. vnd auß goettlicher anraytzung verfueget das Athalia in des konigs haws ertoedt wardt.
Zacharias der sun ioiade wardt zwischen dem altar vnd tempel auß beuelh des koenigs ioas versteinigt darumb das er ine straffet dz er den weg des herren verlaßen het.
Baasim der konig Syrie hat iudam zu der zeit achas verwuestet von des wegen hat ine Teglatphalazar zu Damasco belegert. die statt gewonnen ine erslagen vnnd das volck verwendet.
Azarias widerstunde bestenndigclich von des gesetzs gottes wegen ozie dem konig iude der do opffernn wolt. etc.
Naboth ein israhelitisch man het einen weingarten bey dem haws des konigs achab Nw ersuchet achab den Naboth ime den weingarten zuuerkauffen. so wolte er eynen garten darauß machen. dess widersetzet sich Naboch. als nw Jezabel das weib achabs ine trawrig darumb gesehen het do troestet sie ine vnnd verfueget das Naboth durch falsch zeuegen angeclagt vnd der gots lesterung beschuldigt vnd also vnschuldigclich versteinigt wardt. vnd do achab gieng den weingarten zeemphahen sendet der herr zu ime den propheten Heliam ime zuuerkuenden die außrewtung sein vnd seins haws von solcher suend wegen.
LI recto:
Blat LI
Aquileya (nach vnserm gezueng Agalay genant) der stett des welschen lands ihenßhalb Padua gelegen. weylend die erst vnd mechtigst vnd auch die schoenst ein wenig vom meer gelegen. ist zu vnßeren zeitten schier verlassen. vnd hat zu disen zeitten (als Carinus bezeuegt) von einem Troyaner Equilo genant. der mit andern auß Troya vertriben wardt den anfang irer erpawung genomen vnd von ime den namen behabt. vnd wiewol ettlich briester vnd thumherren. doch in kleiner anzal in einer gezierten vnd schoenen kirchen zu goetlichen dienst geordent. vnd auch ein wenig hyrten vnd vischer alda sind so wonet doch yetzo kein volck daselbst. also das ettwen ein so herrliche stat yetzo kawm ein castel genant werden mag. Daselbst sind die yetzbenant kirch. vnd der patriarchisch hofe. vnnd die mawrn vmb die stat gefuert. vnd ein iunckfrawen closter. vnd die anzeigungen der werck Peponis des patriarchen. Dise statt hat angefangen zeplueen zu der zeit do die Roemer zu erst wider das barbarisch volck an der Thonaw wonende begunden hand anzulegen vnd wiewol der keyser Augustus octauianus den mereren teil der krieg durch sendbotten geuebt hat. yedoch auff dz er ine neher wer so enthielte er sich in diser art. vnd zohe (als Swetonius schreibt) von Rom gein Rauenna Mayland vnd Agaley. vnd Julia rayset mit ime vnd gieng ir ein kind ab. Die Aquileigianer hielten sich an den Roemernn wider die Maximinischen also getrwlich vnd redlich das sie auß den loecken der weiber (do sie an geadernn mangel hetten) strick zum geschoß machten. Das gewerb vnd die hantirung mit orientischer vnd occidentischer ware vnd kaufmanschatz die daselbst zusamen gebracht warden hat dise stat wunderperlich vnd vberschwencklich reich gemacht. dann dieweil dise statt also in wesen stund do was kein ander ort bey dem Adriatischen meer daran die orientischen vnnd occidentischen lewt mit hanttirung kauffen vnd verkauffen irer habe vnd guetter zueinander komen. Als nw dise stat lange zeit in plueenden wesen gestanden was do wardt sie zu letst von dem koenig Attila gantz zerstoeret. aber die innwoner diser stat fluhen gein Venedig vnd mereten der Venediger statt wunderperlicher weiß. Do der heilig ewangelista Marcus von sand Peter gein Alexandriam geschicket wardt vnd die schiff zu Aquileya beraitet do bekeret er die aquileigioner zu dem glauben cristi. vnd sein heiligs euangelium daz er mit seiner hannd geschriben hat wirdt zu Venedig in hoher erwirdigkeit gehalten. Der heilig Hermacoras der auch von sand Marxen predig bekert. vnd von sand Peter zu Aquilegia vnd in allem Venedig zu einem oebersten ratherren gesetzt wardt hat dieselben gegent alle got vnßerm herren gewunnen mit bekerung zu dem cristenlichen glauben. Denselben vnd auch sand Fortunatum erslug der keyser Nero mit einem peyhel. Von Aquilegia was Cromacius an den der gloriwirdig Iheronimus vil geschriben hat. vnd auch sand Ruffinus der briester der in lateinischen vnd kriechischen schriften also erfaren was. das wir seine buecher vnnd außlegung von irer treffenlichkeit vnd ziere wegen vnder allen buechern vnnd schriften der lerer der kirchen nit die mynnsten achten.
- ↑ WS:Vorlage: rnben