Der werlde trost vnd al ir werdekeit

Der werlde trost vnd al ir werdekeit·
ir gv̊ten reinen wib·
ich sůch eht aber an úch helfe vnd frúndes rât·
ich han geklaget so sere minú leit·
dc manic tvmber lib·
die langen klage mir zegv̊te niht gar veruat·
da von zwiualdet sich min sendú not·
min frǒwe tůt an froͤiden mir den tot·
vil vngemv̊t· da bi vil scham rot·
tv̊nt mich die iehent ich si nv niht alse frůt·

Ob mich min klage niht anders kan vervan·
vnz an min endes zil·
wan dc ich iemer mich ir trostes vinde blos·
die ich zetroste vs alder werlde han·
vnd iemer haben wil·
so mv̊s ich sv̊chen dvr not mir ein ander los·
min lib si fro den lât in froͤiden varn·
der froͤiden schin· sol spotes mich bewarn·
dc herze min kan senen niht gesparn·
vf ir genade sol dc nv min leben sin·

IR gv̊ten wib ob iv der rat gehage·
den ich mir selben han·
fúr klagendú leit vnd ǒch fúr sende not gegeben·
sit iv min lob ist alle mine tage
mit trúwen vndertan·
so missebriset^{[WS 1]} an mir niht dc selbe leben·
ich meine dort al da ich trostes ger·
vnd han gegert· mit trúwen wol lange her·
wurde ich gewert· ich wurde es lihte der·
der al der werlte sich dúhte vor froͤiden wert·

Anmerkungen (Wikisource)

1. Vorlage: missebꝛiſtet.