Wunneclichen ſol man ſchowē

Wunneclichen ſol man ſchowē·
meien ſchin vber ellú lant·
vogellin ſingē in den owen·
die man dike trurig vant·
ſwa e lag vil tǒb dv́ heide·
da ſiht man ſchone ǒgenweide·
nv iſt min lieht̾ meigē tag·

Swenne ich ſihe die frowen min·
wunneklichen voꝛ mir ſtan·
gar gelich dem liehtē ſchine·
vō dem ſvnnē wol getan·
der liebe got vber ellú riche·
reht alſo dú mīnekliche·
min h̾ze vf durh lúhtet hat·

Wol ir wie ſi valſches ane·
in wiblichē zúhten lebet·
reht alſam der liehte mâne·
in den ſternē dike ſwebet·
dē ſtat wol gelich dú reine·
nieman vindet die ſchonen alleine·
ſi iſt gantzer tvgēde vol·

Swenne dú liebe vn̄ ǒch dú beſte·
lachet ich wenne ir roter mvnt·
nahtes vs der vinſter gleſte·
eý ſolt ich in lange ſtvnt·
tǒgen ſpehen in rehter nehe·
dike ich gerne bi mir ſehe·
die vil liebte rote bꝛehen·

Moͤhte ich gegen der die ich meine·
tvſent manne dienſt gepflegē·
das kvnde alles harte kleine·
gegen ir richē lone wegen·
ich wil an die reinē gv̊tē·
lones noch genaden mv̊ten·
als vō reht ir eigen man·