Willekomen si der svmer schoͤne (Der Kanzler)

Willekomen si der svmer schoͤne·
willekomen^{[WS 1]} si sin zit·
dv́ vil manige froͤide git
alten vnd den ivngen·
willekomen si der vogel doͤne·
willekomen si der kle·
dvr den wunnekliche als ê·
blv̊men sint gedrvngen·
willekomen si dv́ liehte svnne·
dv́ den winter wichen tv̊t·
willekomen si dú blv̊t·
vnd des meie wunne·
Svmer vroͤit vnd werdv́ wib·
heilent sendes herzen swere vnd troͤstent mannes lib·

Creatúren zam vnd wilden beiden·
tet der arge winter we·
wan siht rifen vnd sne·
iamers vil in brúwen·
we wc ir den winter wc gescheiden
die went aber zweien sich·
svmer wil gewalteklich
minne wider nv́wen·
dank hab er der alsust in minne weket·
dank hab der den wilden walt
vnd die heide wol gestalt
mit gezierde deket·
Svmer froͤit vnd werdv́ wib·
heilent sendes herzen swere vnd troͤstent mannes lib·^{[WS 2]}

Frowe minne sit dv kanst betwingen·
beide man vnd ǒch dv́ wib·
troͤste diner diener lib·
laz si niht verderben·
dv solt mit der zit in froͤide bringen·
so wirt dienst mit lone ervolt·
gerne dv sis eren solt·
si wens an dich werben·
hoͤre wes si dir mv̊tent svͤze minne·
lers ǒch sendú herzen wern^{[WS 3]}·
lern ǒch sendú herzen gern·
werdv́ kúniginne·
Svmer froͤid vnd werdv́ wib·
heilent sendes herzen swere vnd troͤstent mannes lib·^{[WS 4]}

Anmerkungen (Wikisource)

1. Vorlage: willekom̄e.
2. Vorlage: Svm̾ froͤit ⁊c̾·
3. Vorlage: g̾n.
4. Vorlage: Svm̾ froͤid· ⁊c̾·