Wer nu ze vroͤden ist gezalt
[195r]
Wer nu ze vroͤden ist gezalt·
der wirt gewert·
wes er begert·
von des liechten meien zit·
zergangen ist des winters nit·
gar ane strit·
dú heidú lit·
in bernder bluͤte wol bedancht·
Mit gruͤnem lǒbe stet der walt·
bekleidet wol·
recht als er sol·
gen der wunne gesten sich·
in manger hande varwe rich·
so húgelich
gedúchte mich·
nie der kleinen voges bracht·
Der sunnen glantz
ist worden gantz·
die der arge winter twanc·
das si dur truͤbe wolken drang·
an iren dang·
dú hat ir swang·
gewunnen das si schone spilt·
Der suͤsze lust mit siner tuft·
hat erkirnet sin geschicht·
das man vil bernder bluͤte sicht·
doch hab ich nicht·
ze vroͤden pflicht·
von sorgen gros der mich bevilt·
Ein[WS 1] roter munt·
[195v] hat verwunt·
mir das sende hertze min·
durch gantzen lib·
ach selig wib·
tů mir diner helfe schin·
Sid wiblich zucht·
mit bernder frucht·
ist an dir worden sigehaft·
da von hat mir mit meisterschaft·
der minne kraft·
min herts gesaft·
das es mir grůnet zaller zit·
Recht als ein gras·
das tǒwig nas·
von des meien túfte wirt·
da von es saf vnd gruͤne birt·
vns was ver irt·
der wunne hirt·
von des argen winters nit·
Doch ist sin has
nu worden las·
man sicht vnder sinen dang
vil richer wât·
die meie hat·
da bi hoͤrt man der vogel sang·
Von leide scheide vrǒwe mich
sid ich in sorgen brinne·
la mich din guͤte machen heil·
Ach reine meine· das ich dich
fúr alle vrǒwen minne·
so wirt min sendes hertze geil·
ich dien nf den gedingen·
das ich durch dich belibe vro
Mag mir dar an gelingen·
so stet min gemuͤte ho·
gen der geschicht·
ze vroͤden pflicht·
hat das sende hertze min·
das noh din rotes múndelin·
mir wendet pin
sin zarter schin·
hat der minne slos gewalt·
Da von sin grůs
mir tete bůs·
Angestlicher arebeit·
dú mich machet vngemeit·
dú minne sneit·
mir sorgen kleit·
dú machent mich vil senden alt·
Ich selig wib·
dur dinen lib·
můs ich tragen sende not·
In selche wat·
gebrisen hat
mich din zartes múndel rot·
Anmerkungen (Wikisource)
- ↑ Vorlage:e in.