Wart ane wandel ie kein wib (Mit aufgelösten Abbreviaturen)

Wart ane wandel ie kein wib·
dc ist si gar der ich den lib·
han gegeben fúr eigen·
si rǒbet mich der sinne^{[WS 1]} min·
si ist schoͤne alsam der svnnen schin·
ia bin ich niht ein heiden·
si sol genade an mir began·
vnd sol gedenken dc ich ir wc ie vil vndertan·

Was bedorfte des ein wib·
dc ich so gar dvr si den lib·
verlos vnd al min sinne·
si ist so vaste niht behv̊t·
edoch so dvnket si mich gůt·
des bringe ich si wol inne·
es were an miner frowen ein slag·
si sol gedenken ob si toͤrschen ie bi mir gelag·

Was wisset mir der beste man·
ich habe ime leides niht getan·
er froͤt sich ane schulde·
dc er in hat von mir geseit·
dc ist mir húte vnd iemer leit·
er verlv́set mine hulde·
mir wirret niht sin boͤser kib·
wc half dc er toͤrschen bi mir lag io^{[WS 2]} enwart ich nie sin wib·

Anmerkungen (Wikisource)

1. Vorlage: sv́nne.
2. Vorlage: ion.