Vil reinú mv̊ter vnd maget
[353v]
In dem don· Der eren spiegel ist dv́ schame·
Vil reinú mv̊ter vnd maget·
rose ane sv́nden dorn·
von dir dú schrift gros wunder saget·
wir waren alle nah verlorn·
do half vns din kúsche vnd din gvͤte von der sweren not·
wir sin in arger zit betaget·
senfte vns den gottes zorn·
din svn dir niemer niht versaget·
der helle wirt hat des gesworn·
er welle vns verteilen in den eweklichen wernden tot·
bitte got vnd gebúte dem eingebornen svne din·
dc er vns hie niht lasse alsvs verweiset sin·
dvr solher froͤide kv́nfte·
die dir zeschine brahte siner vrstende sigenv́nfte·
zetode der den zwilhen tot an vns zetode slv̊g·
vnd ab vns tẘg·
sv́nden vngefv̊g·
vnd sin menscheit vúr vns trůg·
des wc der creatúre von ir schoͤpfer me danne genv̊g·
dc er sich ze martere an dc frone krúze fúr vns bot·
Es wont ein wurn in einem hol·
der stiftet manig mort·
gar ark mag ich in nennen wol·
er ruͤret bein vnd schepfet wort·
er ist snabelreser danne ein viper nater mvge sîn·
sin swanz[WS 1] der ist gelippes vol·
gar giftig ist sin ort·
da vor sich gv̊t man hvͤten sol·
er meinet her vnd tútet dort·
wilent in dc wasser ist sin gir vnd wilent in den win·
vnder tvsent hant ir niht wan einen namen·
der wise adam der kvnde ir[WS 2] einen nie gezamen·
do er viel in schulde·
dem selben wurme giht ǒch salomon grôsser vndulde·
david flv̊chte im vnd dar zv̊ manig wiser [354r] man·
sit nieman kan·
im gebinden an·
so binde in doch der gottes ban·
dar zv̊ schende in der mit im vs fronen himelriche endran·
ich weis wol dc sich an in werdent mestent cleinú wúrmelin·
Der eren spiegel ist dú scham·
swer sich dar inne ersiht·
der wirt vnzeme bliken[WS 3] gram·
dú schame hat mit kúsche ir pfliht·
dú schame ist argen worten vigent vntrv́wem has vnstetem flůch·
scham ist ein tvgent dv́ mannes nam[WS 4]
gegen frowen prises giht·
dú reinen wib tv̊nt man alsam
ir beider lieb mit schame geschiht·
schame get[WS 5] edelem gesteine vor vnd túret bas danne sidin tv̊ch·
schame ist mit bescheidenheit der werden minne bi·
dú scham in eren garten ist ein blvͤndes zwi·
dú schame ist eren schilt·
dú scham alsam ein reines kint in schoner frowen schozen spilt·
schame zieret reinú wib vnd wirdet edelen man·
schame kan·
leiden vf den ban·
da nie schanden trit kam an·
swer schame minnet den bkret in schanden dienest selten han·
scham ist ein dú hohste tugent sagent vns die meister vnd dú bůch·
Der kúnig Nabuchodonosor·
in einem trǒme sach·
ein bilde hohe stan
dc hǒbt wc gvldin als er iach·
silberin arme vnd brvst ein teil êr vnd isenin·
die fuͤsse waren schirbin hor·
die sit dc isen brach·
der trǒn gieng sinen sinnen vor·
betúteklich ein wssage sprach·
kúnig der trǒn ist nv bi dir vnd wirt nach dir der werlte schin·
kúnig dv der wernden bildes hǒbet golt·
nach dir ein riche bringet silberinen solt·
ein eris dar nach kvmt·
dar nach dc isen erin bringt vnd schirbin fv̊s zestvken drvmt·
hie bi so mvgt ir merken wie es in der werlde ste·
dc galt wc ê·
silber dar nach me·
nv haben wir ein isenin we·
dc witwen vnd weisen machet mangen iemerlichen schrê·
des svln sich die fúrsten schamen svnt si schirbin fvͤsse sin·
Swel fvchs sich sines mvsens schamt·
der mv̊s verderben doch·
dv́ mvs hat ein vil swaches amt·
si vert in eines froͤmdes loch·
siecher arzat armer wissage· leider gast die sint vnwert·
swer wilden marder in schôzen zamt·
vnd leit dem lewen ein ioch·
ob im sin hant da niht erlamt·
so mag er doch wol sprechen och·
ohsen krone zimt niht wol noch in des zagen hant ein gv̊t swert·
mv́nches tanzen nvnnen húbescheit vnd des affen zagel·
des meien rife vnd in dem ǒgesten ein starker hagel·
mir selten wol behaget·
vs richen mannes mvnde lvge vnd swa den bern ein eichorn iagt·
mich wundert ermv́ hohvart vnd ist alter man vnwis·
der werlte pris·
smilzet sam ein is·
liebem kinde ist gv̊t ein ris·
swer ane vorhte wahset der mv̊s svnder ere werden gris·
bi disen meren stât es húre michels boͤser danne vert·
Ein ieglich mensche mv̊s verzagen·
an froͤiden so der tot·
beginnet in sin herze iagen·
vnd es gat an die starken not·
vnd er[WS 6] mit dem armen libe hat vil iemerliches spil·
die richen svn die armen klagen·
wan es in got gebot·
vnd svln ir armv̊t helfen tragen·
vnd mit in teilen gerne ir brôt·
merkent wol es krumbet vrú swc zeinem hâggen werden wil·
vil maniger wenet wîse sin der ist leider krumb·
da von sint dú reht in allen landen krumb·
die wile es also gât·
ein man der ber sin liebes kint· die wile vnz es sich beren lât·
swenne es vs der hitze kvmt vnd es ist vngebert·
so ist sin gevert
gewahsen lihte zehert·
dc es sich dem beren wert·
so wirt versvmet swc man droͤit oder vf sinen rugge gert·
des siht man in genv̊gen stetten úbeler schalke vil·
Singe ich dien lúten minú leit·
so wil der erste dc·
wie dietrich von berne schiet·
der ander wa kúnig ruͤther sas·
der dritte wil der rú̂ssen stvrn so wil der vierde eggehartes not·
der fúnfte wen kriemhilt verriet·
dem sehsten tete bc·
war komen si der wilzzen diet·
der sibende wolde eteswas·
heinmen ald heren wichen sturn sigfrides ald hern eggen tot·
so wil der ahtode da bi niht wan húbschen minne sang·
den nv̊nden ist dv́ wile bi den allen lang·
der zehende enweis wie·
nv sust nv so nv dan nv dar nv hin nv her nv dort nv hie·
da bi hete manger gerne der ýmlvnge hort·
der wigt min wort·
ringer danne ein ort·
des mv̊t ist in schaze verschort·
svs get min sang in manges orn als der mit blîge [354v] in marmel bort·
svs singe ich vnd sage ú des iv niht bi mir der kv́nig embôt·
Als des lewen welf geborn·
werdent so sint si tot·
vil grimmeklich so ist sin zorn·
vil iemerlich so ist sin not·
vil lute er in ir ore schrît des werdent wider lebendig sie·
der helfant wasser hat erkorn·
dis wunder got gebot·
sin fruht were anders gar verlorn·
der strus mit sinen ǒgen rot·
drîe tage an sinú eiger siht des werdent us gebruͤtet die·
der adlar lat sin kinder in die svnnen sehen·
dú des niht tv̊nt da mvgt ir michel wunder spehen·
dú lat er vallen nider·
der fenix[WS 7] der verbrennet sich vnd wirt lebende nach dem vúre wider·
von liebe er krimet ǒch der pellícanus sinú kint·
swenne er si vint·
tot das niht ein wint·
so tůt er rehte als er si blint·
er nimt sins herzen blv̊t vnd machet dc si wider lebendig sint·
mit der hezeichenvnge sin wir von der helle erloͤset hie·
Ich svnge ein bispel oder ein spel·
ein warheit oder ein luge·
ich svnge ǒch wol wie titerel·
die templeise bi dem grale zuge·
wie suͤze ist sýrenen don vnd ark des cocatrillen zorn·
ich svnge ǒch draken fúrin kel·
vnd wie der grife fluge·
wie sich des salamanders vel·
in heissem fúre strahte vnd smvge·
vnd wie sich teilte zchimeren lib vnd wie dú vipper wirt geborn·
ich svnge ǒch wol wie sinú eiger bruͤten kan der strus·
ich svnge ǒch wol wie sich der fenix ivnget vs·
ich svnge ǒch wie der lit·
der manigen in der wunder burg verslunden hat dur sinen git·
ein wunder wont dem hove bi mit wunderlichen sitten·
mit pfawen schritten·
vnd mit menschen tritten·
kan es lagen losen bitten·
es hat mit siner zvngen wafen manges herren mv̊t versnitten·
dem ka ich gesingen niht min rede ist an ime gar verlorn·
Wer kan den lúten lúge erwern·
lug ist ein alter hort·
mit lvge mv̊s sich vil maniger nern·
lvg hat gestiftet mangen mort·
lvg hat einen argen vatter lug hat tvmber kinde vil·
lvg lat sich als ein weich wahs bern·
lug hat vil svͤsse wort·
mit lvge kan maniger eide swern·
lug hat vil manig spitzig ort·
lvg ist ein vil snelles úbel lug ist der boͤsen geiste spil·
lug ist in dem wasser lug ist komen vber mer·
lug hat gegen der warheit ein vil breites her·
lvg kvmt an babestes tv̊r·
lug wont ǒch schonen frowen bi man treit ǒch lúge den fúrsten vúr·
lug ist in doͤrfern vnd in bv́rgen lvg ist in der stat·
lug hat den pfat·
den der tievel trat·
do er adamen essen bat·
den apfel lug git mangem schach lug spilt vf maniges toren mat·
lvg hat sam vnd ein krut des wurze niht erdorren wil·