Uil minneklichú minne la

Uil minneklichú minne la·
warvmbe tv̊st dv mir so we·
dv twingest hie nv twinge ǒch da·
versv̊che wer dir widerste·
nv la schǒwen ob dv iht túgest·
dv darft niht iehen dc dv in ir herze mv́gest·
es wart nie slos so manicvalt·
dc vor dir gestvͤnde dv liebe meisterinne·
slůs vf sist wider dich zebalt·

Vil minnekliche minne ich han·
von dir verlorn minen sin·
dv wilt gewalteklichen gan·
in minem herzen vs vnd in·
wie sol ich ane sin genesen·
dv wonest iemer da er inne solte wesen·
dv sendest in dv weist wol war·
da mag er leider alterseine niht erwerben· owe dv soltest selber dar·

Vil minnekliche minne ich wil·
dir vmbe dise botteschaft·
noch fuͤgen dines willen vil·
wis wider mich nv tvgenthaft·
din lib ist reiner tvgende vol·
mit luterlicher reinekeit getúret wol·
gebringest dvs an dine stat·
so la mich in das wir si mit ein ander gesprechen· mir missegie do ichs eine bat·

Vro selde teilet vmbe sich·
si keret mir den rugge zv̊·
da enkan si niht erbarmen sich·
in weis was ich dar vmbe tů·
si stet vngerne gegen mir·
gen ich hin fúr ich bin doch iemer hinder ir·
sine růchet mich niht ane sehen·
ich wolte dc ir ǒge an ir nekel stvͤnde· so mvͤst es ane ir danc geschehen·

Wer gab dir minne den gewalt·
dc dv doh so gewaltig bist·
dv twingest beide ivnge vnd alt·
da fúr kan nieman keinen list·
nv lob ich got sit dinú bant·
mich svlen twingen dc ich so rehte han erkant·
wa dienest werdeklichen lit·
da vone kvme ich niemer gnade frowe kúniginne· la mich dir lieben minv́ zit·