Towig gras gel bꝛune blůmen ſchoͤne

Towig gras gel | bꝛune | blůmen ſchoͤne·
dú vil liebe kvnſt des meien bꝛinget·
ſo dú lerche lúftet ir gedoͤne·
das ir ſchal vf dur dv́ wolken dꝛinget·
da bi hoͤꝛet man gar vn verboꝛgen·
in den owen vberal·
ſvͤſſen ſchal der nahtegal·
ſo mv̊s ich min ſendes leit beſoꝛgen·

Steine krut ſint an tvgenden riche·
woꝛt wil ich dar obe an kreften pꝛiſen·
mit ir woꝛten dú vil minnekliche·
mehte herzeliebes mich bewiſen·
ſuͤſſe woꝛt zeliebe vſ liebes mvnde·
ſuͤſſe vn̄ in des herzen grunt·
ach was liebe wurde kvnt·
ſwer bi herzeliebe minne enpfvnde·

Minneklich gevar in roſen roͤte·
bluͤt der ſchoͤnen wengel mvnt ir kinne·
ob mich des ir gvͤte ir tvgende noͤte·
das ich ſi ſo herzeklichen mīne·
da iſt uenvs gar ane alle ſchvlde·
amoꝛ iſt din vakel heis·
ſelker noͤte ich niht en weiſ·
warú liebe iſt mīne ein vber gvlde·

Swem nv ſin h̾ze ī froͤidē ſwebe·
d̾ mac vn̄ ſol vō ſchuldē fro gebarē·
ich mv̊s eht trurē die wile ich lebe·
mir wart nie kvnt ī allen minē iarē·
vō d̾ mīneklichē ein lieblich gruͤſſen·
des mv̊s ich in ſoꝛgē ſin·
ſi iſt ſo gv̊t dú frowe min·
ſwāne ſi wil ſi mag es wol gebuͤſſen·