Topographia Braunschweig Lüneburg: Wollerßhausen

Wollerßhausen.

Das Adeliche Hauß vnd Hoff / zusampt dem Dorff Wollershausen / im Fürstenthumb Grubenhagen belegen / mit allen seinen pertinentz-Stücken / hat vor dritthalb hundert Jahren denen von Minnigeroda zugestanden / auch noch / vnd wiewol es für diesem nicht also gebawet gewesen / wie jetzund / sintemahl es auff dem Walle geheissen / weil darauff für diesem ein Fischerhauß / nebenst einem Blockhause oder Gefängnuß gestanden / so gebens doch die Vhrkunde vnd rudera der alten Werckstück der Steine / deren man viel in der verbranten Erden gefunden / als ein Fundament deß Gebäwdes / daß vor etlichen langen Jahren ein Adeliches Hauß allda gestanden haben mag. Das jetzige Adeliche Hauß aber ist kaum vor 50. Jahren / von Johann von Minnigeroda new auffgebawet worden / Es ist aber dasselbe gar bequem vnd wol auffgeführet worden / vnd in das gevierdte begriffen / rings vmb das Hauß ligen allerhand Obst- Küchen- vnd andere aptirte Gärten / hinten aber an demselben ist zu befinden eine Mahl- vnd Oelmühle / welche dem Hofe vnd gantzem Dorffe sehr nützlich / darneben ligen die lustigen Aenger vnd Wiesen / so auff beyden seiten oben vnd vntenwerts hinstreichen.