Topographia Braunschweig Lüneburg: Lutter am Barenberge

Lutter am Barenberge.

Das Fürstl. Braunschweig-Wolfenbüttelsche Ampthauß Lutter am Barenberge / haben vor Jahren die Tempelherren inngehabt / wie auch noch bey Menschen angedencken darauff Zellen vnd Altare zu sehen gewesen / vnd wie dieselbe zerstöret vnd außgerottet / haben die von Schwichold das Hauß vnd Ampt bessen; jetzund aber gehört es / sampt allen Dörffern vnd Gerichten / zur Consistentz deß Wolffenbüttelschen Fürstenthumb.

Sonst ist dieses Ampt vnd Hauß Lutter / sampt dabey gelegenen vier Dorffschafften / so mit ihren Feldmarcken zusammen stossen / mit Bergen vnd Holtzungen gantz vmbgeben / in einer fast lustigen gegend gelegen / vnd grentzet mit Seesen / Woldenberg / vnd Liebenburg / ligt von der Fürstl. Residentz Wolffenbüttel 3. Meil / von der Statt Goßlar zwey / von Seesen zwey / vnd von Bockenem eine Meil weges. Es ist ein zimlich alt Gebäw / wiewol mit taurhafften / vnd mit Schiefer gedeckten Meyereyen vnd Stallungen versehen. Mitten auff dem Platze / im Hause / stehet ein grosser vngeheurer Thurn / ohn Eingang vnd Thür / von sehr festen vnd harten Kalck vnd Steinen hoch auffgemauret / zu sonderbarer Vestung damals / als das Faustrecht annoch gegolten.

In hiesiges Ampts Dorffe Nienwalmoden stehet ein altes Maurwerck / so vormals eine Vestung / vnd Thedeln von Walmoden / der Vnverfehrte genant / Adelicher Sitz gewesen / vnd ist solchem Ort / zu gemeltes vnverfehrten Walmoden Zeit / mit einer Belagerung zugesetzet / vnd endlich mit dem Wasser überwunden / verwüstet vnd zerstöret / wie dann der vffgeschüttete Damm / an beyden seiten deß Wassers / die Reyle genant / annoch stehet / vnd mit grossen starcken Holtze bewachsen ist. Es werden auch vmb diesen Ort annoch kleine stählerne Pfeile in der Erden gefunden / dahero abzunehmen / daß es eine geraume Zeit mit solcher Zerstörung seyn muß / vnd das Büchsenschiessen noch nicht erfunden gewesen.

Oben Hahusen / nacher Seesen werts / an der rechten seiten / ligt der Bahrenburg / davon das Ampt den Nahmen Lutter am Bahrenberg hat / wird auch der Langenberg genant; An der lincken seiten gegen über / hat man den kleinen Bakenberg in diesem Ampte / vnd allernechst dabey den grossen Bakenberg im Ampt Seesen / dahero die Irrung folget / daß hiesiges Ampt auch Lutter am Bakenberg / von etzlichen geschrieben vnd genennet wird.

Bey diesem Ampthause im offenen Felde / ist die Schlacht zwischen dem Könige in Dennemarck / vnd General Tylli / Anno 1626. geschehen / da die Keyserl. die bekante grosse Victoriam erhalten haben. Es haben sich zwar damals etzliche tausent von der Dänischen Infanterie auff dieses Hauß reterirt / sich aber bald / sampt allem was darauff gewesen / auff Discretion ergeben müssen.

Sonsten ist auch der Keyserl. Rittmeister / vnd beruffener Partheyengänger / Levin Sander / aliàs Nimmernüchtern genant / welcher den Schwedischen hin vnd wieder nicht geringen Abbruch vnd Schaden / durch Vberrasch vnd Einfall gethan / Anno 1641. allhie im Ampt am Newerberge / von einer Lüneburgischen Parthey auß Hildesheim / so sich daselbst am Berge im Busch verborgen gehalten / in einem holen Wege / nach dem ihm sein Pferd geschossen / endlich von einem Reuter / Dieterich Block genant / überwältiget / von denselben biß für Hildesheim an den Galgenberg gefänglich mit weggeführet / vnd daselbst / weil er für Geschoß / Hieb vnd Stich eisenfest gewesen / mit Aexten / Hacken vnd Hammern niederschlagen worden.