Topographia Austriacarum: Insprugg (Anhang)

Insprugg / Aenipons,

Siehe von dieser der Gefürsten Graffschafft Tyrol Haupt: vnd Ihr Hochfürstlichen Durchleucht / Herren Herren Ferdinand Carlen / ErtzHertzogen zu Oesterreich / etc. Residentz-Statt / vnsern Text / p. 140. seqq. vnd daselbsten auch von dem / ausser der Statt gelegenen / Praemonstratenser Closter Wilthan / jetzt ins gemein Wilden genant: Item / dem Ertzhertzoglichen Meyerhoff / etc. vnnd sonderlichen dem herrlichen Schloß Ambras / ein kleine halbe meil von Insprugg / bey dem Inn gelegen / deß Jahrs 1636. ist die Ertzhertzogliche Residentz / Pallast / oder Schloß / in der Statt / durchs Fewer / übel verderbt worden. Vnd sagt der Continuator Meterani lib. 54. daß dardurch nicht allein viel Personen / so gäntzlich verbronnen; sondern auch die Mühle / vnd der besagte gantze Fürstliche Pallast / vnd Hofhaltungs Residentz / hefftig verderbt worden. Es werden aber / sonder zweifels / die Gebäu wider erneuret worden seyn; wie dann / zehen Jahr hernach / nemblich Anno 1646. den 10. Junii, N. Cal. Hochgedacht Ihre Durchleuchtigkeit / dero Beylager / mit Fräulein Anna / deß Großhertzogens zu Florentz Fräulein Schwester / in selbigem Pallast gehalten haben; vnd ist die Vermählung / in der neu erbauten Kirchen / durch den Herren Bischoffen von Chiemsee geschehen. Anno 1654. liessen sich allhie vnterschiedliche Erdbidem / wie man geschrieben / verspüren.