Swes froͤide an gv̊ten wiben stat

Swes froͤide an gv̊ten wiben stat·
der sol in sprechen wol·
vnd wesen vndertan·
das ist min sitte vnd ǒch min rat
als es mit trúwen sol·
dc kan mich niht veruan·
an einer stat·
dar ich noch ie genaden bat·
da habe ich mich vil gar ergeben
vnd wil dar iemer leben·

Moͤhte ich der schonen minen mv̊t·
nach minem willen sagen·
so liesse ich minen sanc·
nv ist min selde niht so gv̊t·
durch dc ich mv̊s ir klagen·
mit sange dú mich twanc·
swie verre ich si·
doch tůn ich ir den botten bi·
den si wol hoͤret vnd niht siht·
der meldet mich da niht·

Dis ist ein klage vnd niht ein sanc·
da ich der lieben mitte·
irniwe minú leit·
die sweren tage sint alzelanc·
dc ich si genaden bitte·
vnd si mir doch verseit·
swer sol hen strit·
der kvmber ane froͤide git·
verlassen koͤnde des ich niht kan·
der were ein selig man·