Swas hv́re von des meijen gabe was ſo ſpehe

Swas hv́re von des meijen gabe was ſo ſpehe·
das es lihte ſv́nde enphie dvr ſine glanzen wehe·
das wil nv twingen·
winter zen dingen·
das es im der hofart ſtet zebůſe^{[WS 1]}·
des hat dv́ heide ſich begeben· in grawen erden·
ſo iſt dv́ vꝛigemv̊te lerche· demvͤtig worden·
das in den lúften·
hohe dvr gv́ften·
weder ſweibet vf noch ſinget ſv̊zze·
froͤiden vnmv̊zze·
die ich von liebe gewinne·
irret mich zeſange niht·
dis noh ſwas bi mir beſchiht·
doch laze ich niemer·
ich diene ir iemer·
wip ſint alr tvgēde fuͤgerin·

Wip wol dir wol· dv́ lob werdú kreiatúre·
din gvͤte iſt zů menſchen heil· eī gralemezig ſtúre·
dv kanſt voꝛ ſmerzē·
vꝛijē ellú herzen·
die ſich dienten ê· fúr ſender eigen
dich hat dv́ welt· von anegenge hoꝛt angerbet·
der an ſelden rich̾ gúlt· iſt iemer vnverderbet·
das iſt din ere·
div iſt ſo here·
das nie lob· ir zehenden moͤhte erzeigen·
dir ſol ſich neigen·
ſwas hat zů froͤiden begirde·
wan ſwelch wip von rehter tât·
teil an dinem namē hat·
die ſol man pꝛiſen·
got den werk wiſen·
meiſter zeren vn̄ in ir hohen wirde·

Nv rihtent ſwes geburt ie wart von reinen wiben·
minne klagt man wele ſi· von tůſchen landen triben·
mit dem geſange·
den ſi nit lange·
hoͤꝛen wil vs als vnwerden mv́nden
wer ſol danne· wie es mv̊t geſteten· gegen minne gvͤten·
wer ſol ǒch von valſchen mānen reinv́ wip behvͤten·
mīne des waltet·
der ſi behaltet·
dem gebꝛiſt nit an ſolichen fvnden·
doch wil ich kvndē·
wie man ervarn welr wande·
ſwer getragener kleider gert·
der iſt nit minne ſanges wert·
die ſol man ſtillen·
dvrh minne willen·
wan ir mīne ſang iſt wibes ſchande·

Anmerkungen (Wikisource)

1. Vorlage: zeboͤſe.