Svmerzit ich froͤwe mich din

Svm̾zit ich froͤwe mich din·
dc ich mag beschowen·
eine suͤsse selderin·
mines herzen frǒwe
eine dirne div nah krute·
gat die han ich zeinem trute·
mir erkorn·
ich bin ir zedienst erborn·
wart vmbe dich·
swer verholne minne der huͤte sich·

Si was mir den winter lang
vor versperret leider·
nv nimt si vf die heide ir gang
in des meien kleider·
da si blůmen zeinem kranze·
brichet den si zv̊ dem tanze
tragen wil·
da gekose ich mit ir vil·
wart vmbe dich·
swer verholne minne der huͤte sich·^{[WS 1]}

Ich froͤwe mich der lieben stunt·
so si gat zem garten·
vnd ir rose roter mvnt
mich ir heisset warten·
so wirt hohe mir ze mv̊te·
wan si ist vs ir můter hůte
danne wol·
vor der ich mich huͤten sol·
wart vmbe dich·
swer verholne minne der huͤte sich·^{[WS 2]}

Sit dc ich mich huͤten sol·
vor ir mv̊ter lage·
herzelieb dv tů so wol·
balde es mit mir wage·
brich den truz vnd al die hůte·
wan mir ist des wol zemv̊te·
vnd sol ich leben·
dir si lib vnd gv̊t gegeben·
wart vmbe dich·
swer verholne minne der huͤte sich·^{[WS 3]}

Steimar hoͤhe dinen mv̊t·
wirt mir dú vil here·
si ist so húbesch vnd so gůt·
dv hast ir iemer ere·
dv bist an dem besten teile·
der zer werlte froͤiden heile·
hoͤren sol·
des wirstv gewert da wol·
wart vmbe dich·
swer verholne minne der huͤte sich·^{[WS 4]}

Anmerkungen (Wikisource)

1. Vorlage: warte vmbe dich· ⁊c̾·
2. Vorlage: warte vmbe dich ⁊c̾·
3. Vorlage: warte· ⁊c̾·
4. Vorlage: warte vmbe· ⁊c̾·