Svmer wunne swer dich schǒwen

Svmer wunne swer dich schǒwen·
welle der ere in die ǒwen·
vf die berge vnd in dú tal·
wilde^{[WS 1]} missevarwen geste·
hant enpfangen bǒmen este·
wan siht blv̊men vber al·
rilich gedoͤne in svͤzer wise·
singent cleinú vogelin·
meie dc si dir ze prise·
rifen sne mit kaltem ise·
swindent gegen der lúfte din·

Werden^{[WS 2]} alten vnd ir ivngen·
swer den winter wc betwunge·
der en sol niht truren me·
schǒwent an die gruͤnen heide·
wie gar dú von leide scheide·
wie gar wunneklich si ste·
swem in blv̊men vnder bluͤte·
lieblich nahe ein vmbevank·
húre kv́ndet wibes gvͤte·
der laze alles vngemvͤte·
vnd sage des dem meien dank·

Vs einen rosevarwen munde·
kvmt von wibes herzen grunde·
dc man gerne schǒwen mag·
reiner wibe svͤzez^{[WS 3]} lachen·
mag bas sendes truren swachen·
danne ein bluͤtericher hag·
swc vs svͤzem done erklinget·
swc der walt des lǒbes treit·
swc dv́ heide blv̊men bringet·
swc dú nahtegal gesinget·
dast gegen wiben vngereit·

Anmerkungen (Wikisource)

1. Vorlage: wild̾.
2. Vorlage: Verdē.
3. Vorlage: ſvͤzē.