Svmer hīnen kere· mit ſere· ſin ere· ſwachē will

Svmer hīnen kere· mit ſere· ſin ere· ſwachē wil·
heide vn̄ anger woꝛdē ſint vil vngemeit·
walt vō ſinē kleide· mit leide· nv ſcheide· blv̊mē vil·
ſiht mā valwen ī der liehten ǒwe bꝛeit·
leideſ wunder· wil dar vnder· vns beſvnder· tv̊n der winter hoͤne·
kranc ſint ſine loͤne· vil ſchoͤne· gedoͤne· ſtillet er·
dc betruͤbet maniges edeln h̾zen ger·

Swer nv fro belibe· vō wibe· d̾ tribe· truren hin·
vn̄ ṕſe frowē fúr des meien blůt·
wib ſint ane lǒgē· den ǒgē· vil tǒgē ein gewin·
d̾ vil bas danne alle blv̊mē dꝛinne tůt·
wiblich trútē· kan betúten· liep den lúten· fúr der vogel ſchallē·
wib ſint ane gallen· vns allē· enpfallen· ſoꝛge mv̊s·
durh der mīneklichē reinē wibe grůs·

Ich wil mīne grvͤſſen· dú^{[WS 1]} bvͤſſē· ir ſvͤſſen frúnde ſol·
kvmb̾^{[WS 2]} vn̄ ſenelicheſ vngemach·
mīne mit ir ſtúre· gehúre· vil ſúre· ſvͤſſet wol·
vn̄ machet herzeliebe trurē ſwach·
wibes mīne ſtoͤꝛet ſinne· mit gewinne· wil ſi froͤide merē·
mīne dv́ mac lerē· vil erē· ir ſeren· dienſtman·
heilē ſi mit ſenfter arzenie kan·

Anmerkungen (Wikisource)

1. Vorlage: din.
2. Vorlage: kvm̾b̾.