Stammbuch berümpter Fürsten, Graffen vnnd Herren Geschlechter:Seite 57
| <<<Vorherige Seite | Stammbuch Oder Erzölung aller namhaffter vnd inn Teütschen Historien berümpter Fürsten, Graffen, vnnd Herren Geschlechter | Nächste Seite>>> |
 | ||
| fertig | Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
| |
da namen seine Schwaeger / der Graff von Oldenburg vnd Hallermund / die herrschafft zuo jren haenden / vnd stiffteten daruon das Kloster zuo Luchaw / oder Loken / Cistracienser ordens. Metrop. lib. 6. cap. 42.
Es hat auch Graff Heinrich von Oldenburg / weil er dise herrschafft hatte / gestifftet das Kloster Clotaw auch Cistracienser ordens / welchs hernacher gelegt ist worden gehn Reme / Dieweil es aber da an wasser mangelt / ist es transferirt worden gehn Voldorp / da es denn noch ist. lib. 8. cap. 6.
Vnd haben dise herrschafft jnnen gehabt die Graffen von Oldenburg / biß auffs jar 1312. da ist sie ans Hertzogthumb Lüneburg kommen / durch Hertzog Otten hertzog Hansen son zuo Lüneburg. Chro Saxo.
Johan Petersen schreibt im ersten theil seiner Holsteinischen Chronica / dz kurtz zuouorn / ehe die Hertzogen die herrschafft an sich bracht haben / Anno 1306 der letste Graff des geschlechts von Oldenburg / habe eine tochter gehabt vnnd sie zuor ehe geben einem Graffen von Manßfeld / vnd da sie ein mahl jren alten vatter heimsuochen wil / vnd sie vber die Lüneburger heyde gefaren ist / da habe sie im Holtz ein erbaermlich geschrey gehoert / als eines alten Mannes / vnd als bald einen diener was da were / abgeschickt sich zuoerkundigen / weil aber das geschrey jmmer geweret / vnd der diener nicht balde wider kommen / sey sie selbst dem geschrey gefolget / vnd gefunden einen alten betagten Man / deme sein son ein loch machte / vnd jn gebunden wolte darin verscherren. Da sie solchs gesehen / vnd der alte berichtet / es were so eine gewonheit im lande / er hette es seinem vatter auch gethan / habe sie dem son etlich gelt geben / den vatter lenger dauon zuoerhalten / vnd sey dauon gefaren / vnd souil verschaffung gethan / dz solche boese gewohnheit ist abgebracht worden. etc.
Magdeburg / Ist vor zeiten eine herrliche Burggraffschaft gewesen / wie sie denn noch heüt zuo tage die Churfürsten zuo Sachsen haben / vnnd sich Burggraffen dauon schreiben.
Die Ersten Hertzogen zuo Sachsen von Witichindo / vnd sonderlich Heinrich der Keyser / vnnd Otto der erste / haben dise herrschafft inne gehabt / vnnd als Otto da ein Bisthumb stifftet im jar 970 / leibet er diser Herrschafft lehn dem Bischoff ein / doch das der Burggraff den Ban solte bey dem Reiche suochen. Chro. Magdeburg.