Stammbuch berümpter Fürsten, Graffen vnnd Herren Geschlechter:Seite 48

<<<Vorherige Seite	Stammbuch Oder Erzölung aller namhaffter vnd inn Teütschen Historien berümpter Fürsten, Graffen, vnnd Herren Geschlechter	Nächste Seite>>>

fertig	Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.

Anno 1344 hat Graff Heinrich von der Hoia eingenommen das hauß Tedinghausen. Metrop. lib. 9. cap. 18.

Anno 1347 ist Graff Widichindus Bischoff zu^o Minden worden. Metrop. lib. 8. cap. 16.

Anno 1356 hat gelebt Graff Gerhardus von der Hoia / ist Gottfrid dem Bischoff von Bremen beygestanden / wider Mauritium der auch Bischoff sein wolte. Metrop. lib. 9. cap. 41.

Darumb auch die von Bremen jhm die herrschafft schentlich haben verwustet. Cap. sequenti.

Anno 1358 vmb die selbige zeit ist Hertzog Wilhelm zu^o Braunschweig auff Hertzog Erich zu^o Sachsen gezogen an die Elben / vnnd da er jm hatte etliche heüser eingenommen / ist Graff Hans von der Hoia / der hertzog Erichs schwester zu^or Ehe hatte / zu^o jhm gezogen / vnnd so vil gehandelt / das Hertzog Wilhelm zu^o frieden war / doch muste Hertzog Erich jhm seine schwester zu^or Ehe geben / zeüget aber keinen Erben mit jhr. Saxo. lib. 9. cap. 31.

Anno 1370 hat gelebt Graff Albrecht / von der Hoia. Vmb dise zeit ist Graff Otto Bischoff zu^o Münster gewesen. Metrop. lib. 10. cap. 49.

Anno 1388 seind zwen Graffen von der Hoia bey Winsen inn der schlacht / zwischen den Hertzogen von Braunschweig / vnd deme zu^o Lüneburg vmbkommen.

Anno 1394 seind Graff Erich vnnd Graff Otto der Jünger von der Hoia / mit denen von Münster für Steinfort gelegen / den gefangenen Bischoff zu^o entledigen / haben beyde zwo schwestern / der eine Graff Otto / Fraw Helenam. Der ander Graff Erich / Fraw Agneten / Hertzog Magnus zu^o Braunschweig to^echter zu^o Ehegemahel gehabt / deren eine Fraw Agnet Graffen Bussen zu^o Manßfeld hinderlassen witfraw gewesen.

Anno 1398 ist Graff Hans von der Hoia Bischoff zu^o Hildesheim worden. Metrop. lib. 10. cap. 46.

Anno 1407 ist Bischoff zu^o Verden worden / Heinricus Graff zu^or Hoia. lib. 11. cap. 39. Metrop.

Eben vmb dise zeit hat auch gelebt Graff Otto von der Hoia / hat es mit der statt Bremen gehalten / wider die Graffen von Oldenburg. Metrop. lib. 11. cap. 6.