Spilnde wunne

Spilnde wunne·
wil vns der meie bringen·
wir svn froͤlich reien singen·
lieber mere sin gemeit·
swer sich kvnne·
mit liebe lieblich zweien·
der sol froͤide in herze heien·
lieb froͤit wol fúr herzeleit·
swer sich liebes kan·
trutlich vnderwinden·
der mac herze froͤide vinden·
liebes wib vnd lieber man·

Swer erkvnnet·
wc lieb an liebe minnet·
vnd wie lieb nach liebe sinn·
wie lieb liebe lieben sol·
swar der wunnet·
so sinnet eht sin gemvͤte·
ie nach reiner wibes gvͤte·
es froͤit niht so rehte wol·
wer kan mannes lib
bas von sorgen zoͤhen·
vnd sin hohgemvͤte erhoͤhen·
dan ein reine selig wib·

Swem sin herze·
gegen liebe minne enbrennet·
vnd doch herzelieb erkennet·
da tůt liebe wol vnd we·
minne smerze
in iamer herzen seret·
lieb gedinge leit verkeret·
ob ich rehte mich verste·
lieb gedinge ist gůt·
wol fúr herzen swere·
doch gelǒbent mir ein mêre·
iamer herzen sere tůt·

Etteswenne·
leb ich in zwiuel wane·
dc dú liebe wolgetane·
minen mv̊t iht gar verste·
ich erkenne·
niht lieber lieb vf erde·
nach dem herzen min so werde·
wes wil si mich twingen me
si sol sin gewert·
swas si mir gebútet·
si ist die min herze trútet·
ach wer ich so wert·

WIe dú here·
dú liebe vnd dú vil reine·
die ich vor allen wiben meine·
mir bekv́nbert hat den můt·
swar ich kere·
so senent mine sinne·
nach ir werden wibes minne·
si ist noch besser danne gůt·
wafen sender not·
můs ich si vermiden·
wie sol dc min herze erliden·
so bin ich an froͤiden tôt·