Sol ich nv klagen (Mit aufgelösten Abbreviaturen)

Sol ich nv klagen·
die heide·
dast ein iamer gros·
gegen miner not·
in der ich stete brinne·
ich mv̊s verzagen·
vor leide·
sten ich froͤiden blos·
ir mvnt so rot·
berǒbet mich der sinne·
wie solt ich iemer frǒide also gewinnen·
der ich vor allen frowen her gedienet han·
dv́ wil mich lan·
verderben nach ir minnen·

Wolde si entstan·
der trúwen·
die min herze hat·
gegen ir erdaht·
so wer min truren kleine·
si sol sich lan·
gerúwen·
wol der vngetat·
dies an mir maht·
nv lange dv́ vil reine·
dc si min herze lat in vngemv̊te·
vnd ich mich ie mit dienste in ir genade bot·
min froͤide ist tot·
mich entroͤste ir wibes guͤte·