So dú nahtegal beginnet ſingē

So dú nahtegal beginnet ſingē·
ī den ǒwē vberal·
vn̄ mā ſiht die blv̊men ſchoͤne entſpꝛingē·
da die vogel habēt ir ſchal·
ī dem walde wid̾ſtrit·
bin ich vꝛo dc tv̊n ich vf gedingē·
gegē deſ meiē hohgezit·

Sol an ſtet̾ liebe miſſelingē·
iemē dc geſchiht ǒch mir·
in kvnde min h̾ze niene bꝛingen·
noh dekeine zit vō ir·
durh ſi lide ich ſende not·
nah ir mīnen mv̊s ich iem̾ ringen·
mir beneme ſi der tot·

Ein gůt gedinge hat mih her enthaldē·
dc ich niht v̾doꝛben bin·
min ſoꝛgē mv̊ſ ich einer walden·
dc benimt mir gar der ſin·
des mir tete eī wib wol rat·
an d̾ ich min ſtete han behaldē·
doch ſwie kleine eſ mich v̾uat·

Minne biſt dv ſo mā ſeit gewaltig gv̊t̾ wibe·
ſo hilf mir enzit mich twinget not·
bit die gůtē dc ſi minē kvmb̾ noh v̾tribe·
anders dv biſt ſchuldig ligge ich tot·
ſo bitte ich die gůten ſelbe ſo ich beſte kā·
in weis wie wā dc nie wib wart lieb̾ einē man·

Minē frúndē wil ich kv́ndē dc mich hat betwūgen·
ein wib dú mir lieber iſt dāne ich·
manigē tag ſo han ich nach ir huldē her gerungē·
vn̄ dc doh leid̾ kleine hilfet mich·
wie bin ich geſinne· dc ich vō ir niht enkan·
minē mv̊t geſcheidē· we wc ſpꝛiche ich tvmber man·

Hat ſi mine ſtete noh zevollē niht v̾ſv̊chet·
als ein ſtet̾ frúnt dē andern tůt·
ſo erlǒbe ich ir vb̾ mich alſo ob ſis gerůchet·
roͤſten mich rehte in d̾ mīne glůt·
ſwas wandels an mir ſi d̾ w̾de lut̾ gar·
ſo dc geſchiht ſo nemēt min bc ze frúnde lieber war·